Janë duke u mbajtur homazhet në ambientet e Kuvendit të Shqipërisë, në nderim të ish-deputetit Gerti Bogdani. Ky i fundit humbi jetën ditën e djeshme në moshën 44-vjeçare, ku shkak dyshohet një arrest kardiak.
Deputetë, politikanë, miq dhe të afërm po i japin lamtumirën e fundit, teksa homazhet do të zgjasin nga ora 10:00 deri në orën 12:00 dhe më pas do të bëhet varrimi në varrezat e Sharrës.
Partia Demokratike e ka shpallur ditën e sotme, ditë zie, teksa ka ulur flamujt në gjysmë shtizë dhe ka anuluar aktivitetet në të gjithë vendin.
Gerti Bogdani ka qenë për dy legjislatura deputet nga viti 2009 deri në vitin 2017, teksa ka mbajtur edhe postin e kreut të Forumit Rinor të Partisë Demokratike gjatë viteve 2009-2015.
Gerti Bogdani ishte i martuar me aktivisten e njohur Edlira Çepani dhe është babai i dy fëmijëve, Ajrës dhe Reinartit.
