Në procesin penal që zhvillohet në Gjykatën e Posaçme të Shkallës së Parë për Korrupsionin dhe Krimin e Organizuar në ngarkim të ish-drejtoreshës së Autoritetit Rrugor Shqiptar, Sonila Qato dhe vartësve të saj.
Ekspertët e caktuar nga gjykata i parashtruan konkluzionet e tyre më 17 shtator bazuar mbi pyetjet e të pandehurve dhe përfaqësuesve të tyre ligjorë.
Ish-drejtoresha e ARRSH-së, Sonila Qato dhe disa ish-vartës të saj akuzohen se favorizuan një shoqëri në hije në tenderin 19 milionë euro të tunelit të Skërficës në rrugën Kardhiq-Delvinë në vitin 2019.
Ekspertimi i ri u krye pasi u vlerësua i pavlefshëm dhe i papërdorshëm një akt i kryer nga ekspertë të caktuar nga ish-Prokuroria për Krime të Rënda në vitin 2019, pasi nga të pandehurit u ngritën pretendime se ekspertët e caktuar nga organi i akuzës kanë qenë të palicencuar dhe se një prej tyre ka qenë i dënuar për falsifikim.
Pretendimi për nënshkrimin e aktit nga një ekspert i dënuar për falsifikim u konstatua dhe nga gjykata në seancat e mëparshme.
Prokurori i çështjes, Elvis Gokaj kërkoi kohë për t’u njohur me aktin e ekspertimit dhe për të përgatitur pyetjet për ekspertet. Ai tha se do t’i paraqesi seancën e ardhshme.
Për këtë arsye gjykata vendosi të shtyjë seancën më datë 1 tetor, në orën 11:00.
