Policia ka kapur autorin e dyshuar të ngritjes së dronit mbi ambientet e burgut të Burrelit, 36-vjeçarin me iniciale T.A.
Rasti u bë publik dy ditë më parë nga Drejtoria e Përgjithshme e Burgjeve që tha se kishte parandaluar futjen e një droni në burgun e Burrelit. Përmes një njoftimi, Drejtoria e Burgjeve sqaronte se droni nuk përmbante sende të ndaluara, por sipas tyre, hetimet tregojnë se ka një tendencë të grupeve kriminale për të marrë pamje nga brenda burgjeve.
“Pas marrjes së njoftimit se mbi ambientet e IEVP Burrel, ishte konstatuar një mjet inteligjent dron, i cili u neutralizua nga punonjësit e sigurisë së burgut, kanë nisur menjëherë hetimet për dokumentimin e kësaj ngjarjeje”.
Si rezultat i hetimeve të kryera në bazë të inteligjencës policore, u bë i mundur identifikimi, kapja dhe shoqërimi në Komisariatin e Policisë Mat, i autorit të dyshuar të kësaj ngjarjeje, shtetasi T. A., 36 vjeç, banues në Burrel”, citon A2 njoftimin e Policisë.
Prokuroria dhe IEVP Burrel, po vijojnë hetimet për sqarimin dhe dokumentimin e plotë të rrethanave të këtij rasti.
Dy ditë më parë sistemi i burgjeve ka arritur që të neutralizojë një dron që ishte planifikuar të futej në Burgun e Burrelit. Inteligjenca operative e sistemit administroi të dhëna të besueshme mbi planet e një grupi kriminal për të futur sende të ndaluara në burgun e Burrelit.”- thuhet në njoftim.
