Liridon Latifi është transferuar te Shkëndija. Klubi nga Tetova ka zyrtarizuar afrimin më të ri, nëpërmjet një postimi në rrjetet sociale.
Latifi është aktivizuar së fundmi te Tirana, skuadër me të cilën realizoi 7 gola në 30 paraqitje me skuadrën bardheblu.
“Me qenë pjesë e Shkëndijës është nder, sepse vetëm nga ngjyrat kuqezi të fanellës është një gjë shumë e rëndësishme për ne si shqiptarë. Si klub ka një traditë shumëvjeçare që ka bërë në Kupat e Evropës dhe në kampionatin maqedonas” – tha ndër të tjera Latifi në prezantimin e tij.
Gjatë karrierës, Latifi ka luajtur edhe për Kukësin e Vllazninë, Skënderbeun duke fituar gjithçka me korçarët. Latifi karrierë ka pasur edhe klubet e huaja Pushkash Akademia dhe Sherif Tiraspol. Ai ka qenë edhe pjesë e Shqipërisë U19 dhe U21 si dhe Kombëtares A.
Futbollisti karrierën e ka nisur në vitin 2005 te Flamurtarti i Prishtinës, ndërsa më pas karrierën e vazhdoi te Prishtina. Me sulmuesin prishtinas, kuqezinjtë bëjnë një goditje të bujshme dhe përforcojnë edhe më shumë repartin ofensiv.
