Personi që shihni në foton e mësipërme është 22-vjeçari Arsid Hoxha, i cili u vra mbrëmjen e djeshme në Velipojë, bashkë me kunatin e tij, Ersild Ishmi, 33-vjeç.
Autorë të krimit janë dy vëllezërit Edmir dhe Gëzim Frroku, pronarë të hotel “Holiday” në plazhin e Velipojës, teksa i plagosur aksidentalisht në këtë ngjarje të rëndë mbeti dhe kamerieri 26-vjeçar Zyber Zagrad nga Dibra, i cili pas mjekimit në spital është ndaluar nga policia.
Bashkë me të është arrestuar dhe Marjo Pali, 29 vjeç banues në Shkodër. Të dy janë punonjës në hotelin në pronësi të vëllezërve Frroku, por roli i tyre në ngjarje ende nuk është sqaruar nga policia.
Viktimat kishin shkuar për tu sqaruar me pronarët e hotel “Holiday”, por konflikti mes tyre ka agravuar në përdorimin e armëve. Ngjarja ka ndodhur në rrugën nacionale Shkodër-Velipojë, përballë hotel “Holiday”. Arsid Hoxha është burri i motrës së viktimës tjetër Ersild Ishmit.
Ngjarja e rëndë ka zanafillën tek një konflikt i ndodhur mesditën e 28 qershorit të këtij viti në hotelin e dy vëllezërve, Edmir dhe Gëzim Frroku.
Ersid Ishmi kishte shkuar për të drekuar në hotel dhe kamerieri në restorant, kushëri me Ishmin ka debatuar me kuzhinierin pasi është vonuar porosia.
Në këtë debat ka ndërhyrë 33-vjecari Ishmi, i cili ka nxjerrë pistoletën në restorantin e familjes Frroku dhe ka kërcënuar me jetë kuzhinierin. Ishmi u arrestua në Vaun e Dejës më 14 korrik dhe gjykata e Shkodrës la në masë sigurie “arrest shtëpie”.
Mbrëmjen e 19 gushtit, Ishmi theu masën e sigurisë, mori me vete kunatin Arsid Hoxhën dhe shkuan tek hoteli për të sqaruar konfliktin që kishin lënë përgjysmë. Rreth orës 21:00 ka pasur konflikt mes dy vëllezërve Frroku dhe dy kunetërve përpara hotelit.
Dy vëllezërit kanë qëlluar me armë duke lënë të plagosur rëndë dy kunetërit Hoxha dhe Ishmi të cilët gjetën vdekjen sapo hynë në sallën e operacionit në spitalin e Shkodrës.
FOTO/ Kush janë dy vëllezërit në arrati, autorë të dyshuar të vrasjes së dyfishtë në Velipojë
