Periudha e vërës i ekspozon më shumë fëmijët përballë teknologjisë. Kjo lidhet edhe me mungesën e hapësirave argëtuese të përshtatshme për këtë grupmoshë, sidomos në Tiranë.
Pjesa më e madhe e prindërve dhe gjyshërve në Tiranë zgjedhin Parkun e Liqenit Artificial për të shkëputur të vegjlit nga lojërat elektronike, por largësia nga vendi ku banojnë i bën të harxhojnë më shumë kohë në rrugë dhe para për argëtim.
“Vijmë me taksi në mëngjes paguajmë 5 mijë lekë dhe ikim pastaj me taksi prap 5 mijë lekë. 10 mijë lek vetëm transporti që të vijmë tek Liqeni Artificial. Fëmijët gjithë kohës në telefon dhe play station”, u shpreh gjyshja për mikrofonin e A2CNN.
“S’ka hapësira për fëmijët, vetëm pallate janë ndërtuar”, u shpreh një e moshuar.
Gjatë kësaj kohe që shkollat janë pushim, edhe vetë fëmijët pohojnë se nuk kanë një vend për të kaluar kohën e lirë dhe telefoni mbetet një nga mjetet kryesore argëtuese.
Psikologia Lorela Garuli thotë se kjo mënyrë jetese ndikon negativisht pasi i bën fëmijët më agresivë dhe më pak socialë. Kontakti me lojërat fizike është i domosdoshëm, thotë Garuli.
Një nga sfidat më të mëdha të shoqërisë është varësia nga teknologjia, ndaj edhe shmangia 100% e këtyre pajisjeve duket se është e pamundur.
