Sanksionet e perëndimit kundër Rusisë nuk kanë funksionuar. Janë afro 2.3 miliardë në dollarë dhe euro të cilat janë dërguar në Rusi që kur Shtetet e Bashkuara dhe Bashkimi Europian ndaluan eksportin e kartëmonedhave të tyre në mars 2022 pas pushtimit të Ukrainës, sipas të dhënave doganore të parë nga Agjencia e Lajmeve Reuters.
Shifrat e pa raportuara më parë tregojnë se Rusia ka arritur të anashkalojë sanksionet që bllokojnë importet e parave të gatshme dhe tregojnë se dollarët dhe eurot mbeten mjete të dobishme për tregtinë dhe udhëtimin, edhe pse Moska përpiqet të reduktojë ekspozimin e saj ndaj monedhave të forta, citon Reuters. Të dhënat doganore, të marra nga një furnizues tregtar që regjistron dhe përpilon informacionin, tregojnë se paratë e gatshme janë transportuar në Rusi nga vende të tilla si Emiratet e Bashkuara Arabe dhe Turqia, të cilat nuk kanë vendosur kufizime në tregtinë me Rusinë.
Qeveria amerikane në muajin dhjetor kërcënoi me ndëshkime të gjitha ato institucione financiare të cilat ndihmojnë Rusinë të anashkalojë sanksionet dhe ka vendosur sanksione ndaj kompanive nga vendet e treta përgjatë viteve 2023 dhe 2024. Analistët ekonomik në Rusi besojnë se dollari është një monedhë e besueshme dhe për këtë arsye është duke i përdorur masivisht. Dokumentet e marra në shqyrtim, citon Reuters, tregojnë një rritje të importeve në para pak para pushtimit të Ukrainës nga Rusia.
Midis nëntorit 2021 dhe shkurtit 2022, 18.9 miliardë dollarë në kartëmonedha dollarësh dhe euro hynë në Rusi, krahasuar me vetëm 17 milionë dollarë në katër muajt e mëparshëm.
