Ministri i ri i Brendshëm, Ervin Hoxha ka qenë këtë të enjte në plazhin e Golemit, ku ka inspektuar projektin e mbështetur nga ambasada e Polonisë në Tiranë, për të vendosur disa pajisje shpëtimi, që do të përdoren nga kushdo.
Hoxha ka shpërndarë fotot në një postim në rrjetet sociale, teksa shkruan se pajisja quhet “Stenda e Jetës” dhe përfshin kamerdare shpëtimi, një sistem sinjalizimi zanor dhe sistem ndriçimi të integruar, që alarmon duke tërhequr vëmendjen e pushuesve në rast rreziku për jetën e një qytetari në ujë.
Ministri i Brendshëm thekson se detyra e tyre është që të sigurojnë siguri maksimale për pushuesit.
Postimi i plotë:
Sezoni turistik po kulmon dhe jo vetëm portet, aeroporti, akset kombëtare janë të tejmbushura nga turistë vendas e të huaj, por kryesisht zonat bregdetare janë plot me pushues. Detyra jonë, teksa të tjerët pushojnë është të sigurojmë siguri maksimale për ta.
Në plazhin e Golemit, merr jetë një ide e projektit të mbështetur nga ambasada e Polonisë në Tiranë, për të vendosur disa pajisje shpëtimi, që përdoren nga kushdo. Pajisja quhet “Stenda e Jetës” dhe përfshin kamerdare shpëtimi, një sistem sinjalizimi zanor dhe sistem ndriçimi të integruar, që alarmon duke tërhequr vëmendjen e pushuesve në rast rreziku për jetën e një qytetari në ujë.
Isha së bashku me Albanën, ambasadoren e Polonisë në Tiranë, Drejtorin e Përgjithshëm të Qendrës Kombëtare të Urgjencës Mjekësore, si dhe strukturat policore, të shëndetësisë, bashkisë dhe shoqatës vullnetare AFPRA, për të vënë në jetë këtë nismë.
