Me vendim të Këshillit të Ministrave është ndryshuar ditën e sotme ligji për Urdhrin e Mjekut, ku ndryshimet kanë të bëjnë me mjekët e sektorit publik që punojnë edhe në privat.
Pas përfundimit të mbledhjes së Qeverisë, ministrja e Shëndetësisë, Albana Koçiu deklaroi se është caktuar tavani për orët e punës që do të lejohen të punojnë bluzat e bardha të sektorit publik në sektorin privat.
Gjithashtu ajo u shpreh se është miratuar një regjistër elektronik publik për mjekët që punojnë në strukturat e publike, lidhur me punësimin e tyre në privat. Po ashtu, Qeveria u ka ndaluar drejtuesve të institucioneve publike shëndetësore që të drejtojnë klinika private.
“Ndryshimet që kemi propozuar në ligjin dhe që u miratuan sot me vendimin më të fundit të qeverisë, në ligjin për urdhrin e mjekëve, kryesisht konsistojnë në bërjen publike dhe transparente të gjithë informacionit për profesionistët e shëndetësisë që punojnë në strukturat publike sa i përket angazhimeve të tyre dhe private.
Ndryshimi është miratimi i një regjistri elektronik publik që do të garantojë akoma më shumë transparencë për këdo profesionist të shëndetësisë që punon në strukturat e publike, lidhur me punësimin e tij edhe privatisht. Ndryshimi ka të bëjë me atë që është interesi i qytetarëve, garantim i cilësisë së mjekësisë. Qëllimi është shmangja e konfliktit të interesit.
Kemi vendosur edhe një tavan të orëve të punëve për të cilat një mjek që punon në sektorin publik mund të angazhohet dhe të punojë privatisht. Kemi bërë të qarta dhe procedurat për masat disiplinore dhe strukturat përkatëse që do të tregojnë veprimtarinë e tyre. .
Është parashikuar në ndryshimet ligjore që miratuam sot, ka edhe një rregullim të kësaj pike dhe ka të bëjë me faktin që drejtuesit e institucioneve publike shëndetësore e kanë të ndaluar të kenë dhe klinika private dhe ti drejtojnë klinikat private duke qenë titullarë njëkohësit dhe në strukturat spitalore shëndetësore shtetërore dhe strukturat e tyre private.”, tha ministrja Koçiu.
Ky ndryshim në Urdhrin e Mjekut vjen pas skandalit në spitalin Onkologjik në QSUT, ku mjekët kishin ngritur një skemë abuzive për t’i çuar pacientët me sëmundje turmoriale për t’i operuar në klinikat e tyre private.
