Personi që shihni në foton e mësipërme është 35-vjeçari Erdion Muho, i cili u arrestua nga Policia në lidhje me shpërthimin e regjistruar më 24 Qershor në bregdetin e Sarandës, pranë portit të qytetit, ku humbi jetën biznesmeni 52-vjeçar Armand Nelaj.
Muho se bashku me Armand Nelajn, akuzohet nga autoritetet policore se atë mbrëmje kanë tentuar t‘i venë një sasi eksplozivi një anijeje të ankoruar në portin e qytetit, për motive konkurence. Duket se gjatë transportimit të lëndës plasëse, ajo ka shpërthyer aksidentalisht duke i marrë jetën 52-vjeçarit Nelaj.
Burime bëjnë me dije se ata do t’ia vendosnin sasinë e eksplozivit anijes së linjës detare Sarandë-Korfuz, “Finikas Lines”, e cila është në pronësi të Andrea Qirjakos, me të cilin Nelaj ka patur konflikt të vazhdueshëm.
Erdian Muho është djali i një biznesmeni tjetër të njohur në qytetin e Sarandës. Ai merret kryesisht me biznese në fushën e hotelerisë, turizmit dhe transportit detar. Në vitin 2021 Muho ka qenë pjesë e listave për deputet në listat e Lëvizjes për Ndryshim të ish-kryeparlamentares Jozefina Topalli.
Nuk dihet ende nëse Muho ka qenë afër 52-vjeçarit në momentin e shpërthimit dhe si ai ka mundur t’i shpëtojë fuqisë goditëse të lëndës plasëse.
