Kreu i PBDNJ-së, Vangjel Dule ka denoncuar nga foltorja e Kuvendit se si Qeveria po tenton të manipulojë zgjedhjet e 4 Gushtit për Bashkinë e Himarës.
Dule tha se socialistët syojnë rrëmbimin e mandatit të Bashkisë Himarë për të rrëmbyer më pas pronat dhe për të ndaluar greqishten. Ai e konsideroi Vangjel Tavon si kandidat të importuar, teksa sipas tij ka ardhur me gjithë farefis dhe se i kanë çuar edhe bashkëpunëtorë, ku në këmbim u kanë premtuar troje.
Dule tha se e gjithë administrata është shpërngulur në Himarë për zgjedhjet e 4 Gushtit, teksa sipas tij, anëtarët e Këshillit të Ministrave e bëjnë me turne shërbimin.
Dule: I keni çuar sot Himarës një kandidat të importuar. E çuat bashkë me farefisin, dhe i bëtë zgjedhës në bashki. I çuat edhe bashkëpunëtore duke ju shpërndarë role, e duke u premtuar troje. I çuat një kandidaturë produkt i merkatos politike. Kandidaturë që kryeministri e akuzonte si tepsixhi dhe ai kryeministrin drogaxhi. E keni prezantuar si një minoritar. E çoni tek lumi i Vlorës si kandidat, që do ndalojë të flitet greqisht në Himarë. Është i qartë objektivi juaj, himarjoteve doni tu rrëmbeni pronat, dhe banorëve të lumit të Vlorës po tentoni ti merrni ujin e lumit. Në këto kushte keni ndërsyer duke shkelur ligje e parime gjithë administrata është në Himarë. Anëtarët e Këshillimit të Ministrave e bëni me turne shërbimin tuaj për të rrëmbyer mandatin e bashkisë Himarë. Po ju garantoj çfarëdo që të bëni, nuk ka shantazhim, kërcënim e joshje që mund të përdorni për të mposhtur frymën himariote. Nuk mund të rrëmbeni pronën, trashëgiminë e dinjitetin e tyre.
