Eksperti i ekonomisë Klodian Muço ka folur për raportin e DASH për ekonominë ku tha se problematikat që nxori nuk ishin risi por një vazhdimësi e situatës që e dimë dhe e kemi folur prej vitesh.
Eksperti theksoi se raporti i DASH tregoi sërish se sa galopant është korrupsioni në Shqipëri.
“Ky raport konsiderohet si një ndër më të rëndësishmit përsa i përket klimës së të bërit biznes në një vend të huaj dhe konkretisht në rastin e Shqipërisë. Problematikat që nxori ky raport nuk ishin risi por një vazhdimësi e situatës që ne e dimë dhe e kemi folur prej vitesh. Konkretisht, një ndër problematikat kryesore të nxjerra nga ky raport ishte korrupsioni. Niveli i korrupsionit që mbas atij niveli minimum të arritur në 2016, nga 2016 dhe në vijim ka pasur një rritje të vazhdueshme. Shqipëria aktualisht klasifikohet e 98 nga 180 vende. Një nivel shumë i lartë. Tregon se sa galopant është korrupsioni në Shqipëri”, tha Muço për oranews.
