Policia e Tiranës ndërmori gjatë 24 orëve të fundit një aksion për goditjen e shpërndarësve të lëndëve narkotike në kryeqytet. Si rezultat u arrestuan 19 persona, teksa u sekuestrua edhe 1.2 kg kokainë, si dhe qindra doza të lëndëve të dyshuara narkotike heroinë dhe kanabis.
Me një njoftim të dytë, Policia e Tiranës bën me dije se një prej të arrestuarve punonte si shofer në Shërbimet Mbështetëse në Kontrollin e Lartë të Shtetit (KLSH).
Bëhet fjalë për shtetasin Rezart Maqellara. Autoritetet policore theksojnë se ky person nuk është shoferi i Kryetarit të KLSH-së, ashtu siç është përhapur lajmi në disa media, duke i përgënjeshtruar.]
Komunikata e Policisë së Tiranës:
Ditën e sotme, Sektori për Hetimin e Narkotikëve në Drejtorinë Vendore të Policisë Tiranë në kuadër të fazës së dytë të megaoperacionit mbarëkombëtar “Tempulli 3”, arrestoi 19 shtetas ndaj të cilëve Gjykata e Shkallës së Parë e Juridiksionit të Përgjithshëm Tiranë kishte caktuar masën e sigurimit personal “Arrest në burg”, për veprën penale “Prodhimi dhe shitja e narkotikëve”.
Ndër të arrestuarve është dhe shtetasi R. M., me detyrë shofer në Shërbimet Mbështetëse në Kontrollin e Lartë të Shtetit.
Nisur nga disa publikime në media e rrjete sociale, sqarojmë median dhe opionin publik se ky shtetas nuk është shoferi i Kryetarit të Kontrollit të Lartë të Shtetit.
