Bujqësia, një prej sektorëve më jetikë për Produktin e Brendshëm Bruto, ka shënuar një rënie prej 0.68% gjatë vitit 2023. Kjo rënie, më e forta që nga viti 1997, mund të thellohet, sipas ekspertes Ana Vuksani.
Në studion e MCN, ajo u shpreh se bujqësia është në agoni për shkak të reduktimit të buxhetit dhe anulimi i pezullimi i fondeve IPARD.
“Buxheti i këtij viti pati reduktim. Brenda këtij buxheti, 76% shkojnë për shpenzime korrente. Vetëm 24% mbështesin zhvillimin rural dhe fermerin. Kosova subvencionon me 120 milionë euro, shteti shqiptar me 30 milionë. Nuk ka logjikë ekonomike të ulim buxhetit e pastaj të dalim e të themi presim rritje të sektorit.
Shifrat e INSTAT i marr me rezerva. Me reduktimin aktul të blegtorisë, i bie që pas 10 vitesh të mos kemi asnjë kafshë. Kemi thënë që duhet pasur kujdes me politikat e këtij sektori. Ka rënë edhe niveli i punësimit në këtë sektor, me 2.6%. në këtë sektor janë të punësuarv 32.7% e njerëzve, pra është sektori me numrin më të madh të të punësuarve. Ka rënie prodhimi për të gjitha produktet blegtorale dhe bujqësore. Është rritur importi i fruta-perimeve 48%. Pra, jo vetëm nuk janë marrë masa, por këtë vit do të jetë më keq se viti i shkuar. Do të shkojnë drejt falimentit fermerët dhe rrjedhimisht drejt shpopullimit të gjitha këto zona.
Paratë e IPARD kishin të bënin direkt me zhvillimin e sektorit agropërpunues dhe të agroturizmit. Keqmenaxhimi i këtyre fondeve ne kemi humbur pjesën e mbetur, pra 33 milionë euro, por shteti shqiptar duhet të kthejë fondet e marra deri tani. Pra, duhet t’i paguajmë prapë ne. Është ndaluar IPARD 2 dhe kemi zero shans për IPARD 3. Janë 140 milion euro që do të injektoheshin në këtë sektor, që tani është në agoni të plotë. Bujqësia është më keq se në vitin ’97. Pra, para që jo vetëm nuk do të vijnë, por ne duhet edhe të kthejmë ato që kishim përfituar. Pra, 140 milionë euro që do t’i merrte bujqësia shqiptare i merr një shtet më i përgjegjshëm se ne.” – tha Vuksani.
Ajo theksoi se pa fondet IPARD dhe me një buxhet gjithnjë e më të vogël, bujqësia është e destinuar të dështojë dhe një pjesë e madhe e vendit të shpopullohet.
“Problem është edhe mënyra si hartohen politikat subvencionuese. Ato kanë sjellë reduktimin e numrit të kafshëve. Në një raport të FAO-s thuhet se 70 e ca % e punonjësve të AZHBR janë punësuar në shkelje të kritereve. Ka mungesë të theksuar të profesionistëve. Të gjitha institucionet kanë mungesë profesionistësh dhe nepotizëm. Kjo e ka çuar bujqësinë shqiptare në agoni të plotë.” – tha Vuksani
