Këshilli Kombëtar u mblodh në selinë e PD-së për të diskutuar mbi ndryshimet statusore, ndërsa nga kritikët e Lulzim bashës në këtë parti, u pretenduan të paktën publikisht, se nuk janë lejuar të flasin për të paraqitur platformat e tyre.
Por Syri.net ka mësuar se askujt nuk i është ndërprerë fjala, apo nuk i është mohuar ajo, përfshi këtu edhe anëtarëve të forumit më të lartë vendimmarrës mes dy Kuvendeve Kombëtare që njihen si kritikë.
Mësohet se Genti Malko dhe Edit Harxhi kanë paraqitur propozimet e tyre lidhur me ndryshimet në statur, Arben Imami, Sherefedin Shehu dhe Edvin Kulluri, po kështu kanë bërë propozime, të cilat janë hedhur në votim dhe janë rrëzuar me shumicë votash.
Burimet shprehen se pothuajse të gjitha çështjet e ngritura nga disa prej anëtarëve gjejnë pasqyrim në ndryshimet statusore, ndërsa propozimet e tyre janë hedhur në votim dhe janë rrëzuar.
Kështu sikundër mësohet dhe është pranuar edhe nga ish-ministri i Mbrojtjes, Arben Imami, propozimi i tij lidhur me përfshirjen e raportit mbi zgjedhjet, ka marrë mbështetjen e vetëm 3 anëtarëve, ndërsa shumica dërrmuese ka votuar kundër.
Arben Imami, në një prononcim për mediat, tha se “Financat e Partisë, kontrolli mbi financat e partisë është një nga problemet themelore për të gjitha partitë europiane. Mesa duket është një problem serioz edhe për Shqipërinë. Kemi propozuar këtë gjë. Nuk ka diskutime as për këtë gjë”.
Por duket se kjo deklaratë e Imamit nuk qëndron, pasi në ndryshimet statusore në nenin 69 flitet pikërisht për financat e partisë.
Në këtë mënyrë duket se deklarimet e disa prej anëtarëve të Këshillit Kombëtar të PD-së duket se nuk kanë pasur lidhje me atë që realisht ka ndodhur në sallë.
