Skënderbeu duket se ka gjetur qendërsulmues, pas vendit të lënë bosh nga shitja e Nnamdi Franklin Ahanonu dhe Ivan Djantou. Burime bëjnë me dije se pasditen e djeshme ka mbërritur në qytetin e Korçës 23-vjeçari ganez Bismark Charles.
Sulmuesi është bërë i njohur 4 vite më parë te Trepça ‘89 në Kosovë nga ku më pas bëri edhe hapin e madh në karrierë, duke u transferuar te klubi bullgar, CSKA Sofje. Me këtë të fundit Bismark Charles luajti dy sezone, për t’u huazuar më pas te Pirin në Bullgari dhe Zeljzeniçar në Bosnjë.
Pas përfundimit të kontratës me CSKA, ka dalë tashmë lojtar i lirë dhe pritet të firmosë me Skënderbeun. Mësohet se paraditen e sotme, 23-vjeçari u është bashkuar bardhekuqëve në stërvitje, ku ka kryer një stërvitje individuale dhe jo me grupin.
Kjo për shkak se fundin e sezonit të shkuar ai nuk është aktivizuar me ekipin e tij dhe burime bëjnë me dije se ka deklaruar para stafit të Skënderbeut se ka qëndruar vetë larg fushave të blerta për shkak të moslikuidimit të pagesave.
Mësohet se Bismark Charles ende nuk ka firmosur kontratën me “Ujqërit e Dëborës”, por është arritur një marrëveshje paraprake dhe vetëm cilësitë e futbollistit do të tregojnë se sa shpejt do të hidhet firma. Ditën e nesërme ai do t’i nënshtrohet testeve fizike dhe mund të stërvitet dhe me një plan individual, nëse nuk do të jetë në gjendje të mirë.
Gjithsesi, tek Skënderbeu presin shumë prej tij, pasi edhe pse në moshë të re, ka treguar vlera në të kaluarën, duke “shpërthyer” me Trepçën, ku jo më kot e transferoi dhe ekipi bullgar.
