Deputeti i Partisë Demokratike, Asllan Dogjani ka lënë ambientet e Prokurorisë së Posaçme ku ka qëndruar rreth dy orë e gjysmë.
Burime për mediat bëjnë me dije se ai është thirrur në SPAK për t’u marr në pyetje në lidhje me një kallëzim penal të bërë që në vitin 2020 nga disa banorë, përfshirë edhe vetë deputetin demokrat.
Në një reagim jashtë kamerave, Dogjani konfirmoi se pyetja e tij është bërë pikërisht për çështjen që ka kërkuar interpelancë një javë më parë me kryeministrin Edi Rama në Kuvend, në lidhje me problemin e disa qytetarëve në lidhje me zaptimin e hapësirës publike nga pronari i pallatit, por kërkesë u rrëzua.
“Në vitin 2006 është ndërtuar një pallat me ndërtues Ilirjan Çelën, ka bërë shtesa pa leje duke iu shmangur detyrimeve. Për këtë nuk është bërë legalizim, banorët kanë legalizuar vetë pas 20 vitesh pallatin. Para oborrit të pallatit në emër të një të moshuari Ramazan Gjoshi kishte legalizuar kopshtin publik në oborrin e pallatit në njësinë nr. 9. Ja ka kaluar djalit të tij Miljan Çela. Jemi drejtuar kadastrës si banor. I vetmi institucion që ka reaguar. Ka reaguar dhe ka konstatuar se vendimi është i kundërligjshëm”, do të deklaronte Dogjani në Kuvend.
Asllan Dogjani hyri në SPAK rreth orës 10:00 dhe doli prej saj rreth orës 12:30, ku nuk pranoi të prononcohej për mediat.
