Deputeti i PD-së, Ervin Salianji është përplasur me ish-drejtuesin e Policisë së Shtetit Ardi Veliu, teksa është paraqitur në komisionin hetimor parlamentar për të dëshmuar për vjedhjen e sistemit TIMS.
Veliu ka bërë kërkesë qe dëshmia të jepet me dyer të mbyllura, pa praninë e mediave, me pretendimin se disponon informacione të klasifikuara sekret.
“Kërkoj që në mbledhjen e komisionit hetimor të përjashtohen publiku dhe media pasi do të deponohen të dhëna, të cilat kanë të bëjnë me jetën personale të dëshmitarëve dhe të palëve të treta. Publiciteti mund të shpërndajë të dhënat që duhen të mbeten sekret në interes të shtetit”,-tha Veliu.
Kjo kërkesë e tij nxiti debate e shkaktoi batuta në sallë, pasi në përfundim të fjalës së tij, Qefalia tha “shumë mirë e lexoi”, kjo thënie e tij u prit me të qeshura nga kryetari i komisionit Ervin Salianji, gjë që shkaktoi debate në komision.
Salianji ka ironizuar Veliun duke i thënë se deputetët e mazhorancës ndërhynin gjatë dëshmisë së tij sepse dyshojnë që di të shkruajë apo lexojë. Më pas ai i bëri të ditur Veliut se është aty për të dëshmuar për shkeljet e ligjit dhe dhe jo për të ngritur zërin.
Pjesë nga debati:
Ardi Veliu: Nuk kam ardhur të tallesh as ti askush këtu.
Ervin Salianji: Nuk e keni fjalën ju. Kur ta keni fjalën. Atëherë do të flasësh
Ardi Veliu flet pa mikrofon
Ervin Salianji: Zoti Qefalia do ta ketë ngaqë ka dyshim që dini të shkruani apo të lexoni. Me këtë gjuhë fol ndonjë vend tjetër. Bëjeni diku tjetër ku jeni mësuar. Kur e drejtoj unë komisionin nuk e bën dot.
Ardi Veliu flet pa mikrofon
Ervin Salianji: Ti je lesh i tërë në këtë rast. Ti je kokë e këmbë lesh. Nëse ti je analfabet nuk e kemi fajin ne. Përpara meje e këtij komisioni rri me qetësi, drejtoju e përgjigju.
Toni Gogu: Nuk na kanë dhënë të drejtën të ofendojmë
