“Nuk duhet të merremi me pasojat, por me burimin dhe shkakun e tyre. Nuk është çështja se kape 2-3 mjekë, por është të godasësh vatrën e infeksionit. Kryeministri dhe ministrja e Shëndetësisë fshihen pas gishtit dhe po gënjejnë”.
Kështu u shpreh aktivisti Adriatik Lapaj, i ftuar në A2 CNN, teksa foli lidhur me skandalin tek spitali Onkologjik, ku mjekët kishin krijuar një skemë abuzive të transfermit të pacientëve me kancer drejt klinikave private. Sipas Lapajt, në shkresat mes QSUT dhe Ministrisë së Shëndetësisë tregohet se ka pasur limit buxhetor për ilaçet e sëmundjeve të rënda.
“Sistemi ynë shëndetësor ndaj nuk ka ilaçe. Vendoset një tarifë për to dhe nuk ka rëndësi nëse me atë shifër ti blen 50% të nevojës apo 70% të nevojës. Kjo nuk është filozofia se si duhet të funksionojë ky sektor. Kjo mund të bëhet te rrugët, jo te ilaçet. Në një shkresë tjetër thuhet se ilaçi i leuçemisë për fëmijët duhet të jetë në 9000 flakonë. Në 2020 ishin 230, për vitin 2021 janë 0 flakonë, për vitin 2022 janë 333 flakonë, ndërsa për vitin 2023 janë 73. A nuk është kjo vrasje me paramendim? Po t’i marrësh të gjitha, vërtetohet se ilaçet nuk janë në sasitë e nevojshme”, tha Lapaj, teksa shtoi se i njëjti problem nuk është vetëm me ilaçet, por edhe me pajisjet.
Më tej, Adriatik Lapaj, komentoi deklaratën e kryeministrit Edi Rama që sipas këtij të fundit, skandali i zbuluar në Onkologjik është krim kundër njerëzimit. Ai tha se është dakord që është krim kundër njerëzimit, por i kryer nga qeveria. Lapaj e vuri theksin dhe tek heshtja e mjekëve para politikës.
“Jam dakord që është krim kundër njerëzimit, por i kryer nga qeveria e tij. Siç jua faktova me dokumente, filozofia e qeverisë është që ne përcaktojmë një buxhet, pavarësisht sa është nevoja për ilaçe. Ky është krimi i parë kundër njerëzimit. E dyta, është e turpshme që doktorë dhe profesorë të rrinë në rresht për një para politikës, kur politika është në faj. Dhe ky është fati tragjik i vendit tonë, që intelektualët nuk gjejnë guximin për të qenë intelektualë sepse e kanë ngrënë lugën e çorbës, prandaj rrinë ashtu.” – tha Lapaj.
