“Kandidati për kryeministër nuk është çështje protagonizmi, por çështje përgjegjësie e secilit prej nesh brenda PD dhe përsëris që nuk është vendimmarrje individuale, por e strukturave brenda partisë. Nëse më pyet mua, unë do doja që të ishte një figurë që vjen tërësisht nga jashtë politikës.Unë do të preferoja një figurë që vjen nga diaspora, një figurë të pakontesueshme që do të gëzonte besimin e të gjithë strukturës së partisë.”
Ky ishte propozimi që kreu i grupit parlamentar të PD-së, Gazment Bardhi bëri gjatë një interviste televizive rreth 10 ditë më parë, për të cilën Argita Malltezi, vajza e ish-kryeministrit Sali Berisha është kundër.
Në një intervistë për emisionin “Pa Censurë”, Argita Malltezi e konsideroi këtë propozim si një eksperiment të patestuar dhe të rrezikshëm për situatën autokratike në të cilën ndodhet Shqipëria. Sipas saj, ky propozim mund të vlente vetëm pasi Partia Demokratike të kishte fituar zgjedhjet.
“Mendoj që është një eksperiment i patestuar, por edhe i rrezikshëm në një farë mase, sepse vlerësimi me realizëm i situatës autokratike në të cilën ndodhet Shqipëria, i eliminimit të zgjedhjeve të lira, për shkak të masave represive të Ramës me të gjitha format, me drejtësinë, në kapjen e financave publike etj, e bën të pamundur një gjë të tillë, sado që është një ide shumë e mirë. E kam dëgjuar idenë, por kam menduar se bëhet fjalë për një kryeministër pas fitorës së zgjedhjeve, sepse atëherë, kuptohet që është fare e mundur si alternativë.”.- tha zonja Malltezi.
Argita Malltezi i qendroi deklaratës së hershme të kreut të opozitës Sali Berisha për të vendosur me referendum të ardhmen e tij si kryeministër.
“Normalisht, personi që udhëheq fushatën, është kandidati për kryeministër. Sali Berisha, në një xhest unik, ka thënë se pas fitores në zgjedhje do t’u japë mundësinë shqiptarëve me referendum për të zgjedhur, nëse duan që ai të jetë ose jo kryeministër. Mendoj që ka një mazhorancë absolute ndër shqiptarë që, e duan apo jo Berishën, janë të bindur se Sali Berisha nuk bën pazare në luftën kundër Edi Ramës, që ai qëndron në betejë deri në fund, që e çon fushatën deri në fund sipas interesit të popullit opozitar dhe besoj se kjo është një bazë e mirë për t’i besuar atij udhëheqjen e fushatës elektorale, qoftë edhe nga arresti i shtëpisë.”- u shpreh Malltezi.
Ajo është e bindur se, përveç Lulzim Bashës, të gjitha forcat e vërteta opozitare do të pranojnë të bashkohen në një koalicion të përbashkët, të udhëhequr nga Sali Berisha.
