Efektivët e Policisë së Shtetit do të plotësojnë një formular të dytë, pas atij për aplikacionin “Sky Ecc”, ku iu kërkohet të deklarojnë nëse kanë pasur kontakte me krimin e organizuar apo nëse a kanë pranuar para, favore, dhurata ose pasuri me persona të përfshirë në krimin e organizuar.
Lidhur me këtë urdhër të firmosur nga Muhamet Rrumbullaku, eksperti i sigurisë Faik Basha u shpreh në MCN se ky formular do të jetë një formular që më shumë do shërbejë si një presion ndaj punonjësve të policisë. Ai tha se vetëm vetingu mund të bënte pastrimin dhe se asnjë punonjës policie nuk do ta plotësojë negativisht këtë formularë.
“Jam në dijeni të formularit, kam marrë dhe shqetësimet e punonjësve por nuk përfaqëson dinjitet dhe nuk përfaqëson atë që duhet të ketë ky institucion policie përveçse do përdoret si trysni dhe presion ndaj tyre. Punonjësit që janë të lidhur me politikën, paratë e pista, me bandat, me drogën që e kanë shkatërruar këtë institucion, atëherë është vetëm procesi i vetingut që mund të bënte pastrimin dhe jo ky formularë. Për mua është një formular presioni, thjeshtë do vendosi nën trysni punonjësit. Asnjë punonjës policie nuk do ta plotësojë negativisht atë formular.” – tha Faik Basha.
I pyetur nëse ka sot të inkriminuar në radhët e policisë, Basha tha se problemi vjen nga drejtuesit e këtij institucioni dhe se sipas tij ky formular nuk e bënë dot pastrimin nga “koka”, siç e cilësoi ai.
“Unë dua të them se në polici pjesa dërrmuese janë punonjës të rolit bazë që kanë dhe detyrat më të rëndësishme dhe që keq paguhen. Në radhët e tyre mund të ketë një sasi të këtyre punonjëseve që janë në kontakt me krimin, por problemi më i madh i organizatës së policisë nuk vjen nga këta po të kemi një strukturë të pastër që kontrollon pa u ndikuar nga krimi, politika, por përderisa kemi parë që ka drejtues policie që kanë dalë në bashkëpunim të ngushtë me organizatat kriminale duke parë dhe deklarata e SPAK lë të kuptojë se në këtë institucion ka shumë drejtues të lartë dhe ky është problem pastrimi i nivelit drejtues, por besoj se ky formular nuk e bën dot këtë dhe s’do ketë asnjë deklarim nga këta zyrtarë sepse janë ata që marrin dhurata dhe para jo punonjësit që marrin para për një rrip sigurimi. Që të kryhet një pastrim duhet të kruhet nga koka, duhet ta plotësojë ministri këtë formular, dhe drejtorët e qarqeve, drejtoritë qendrore, nga këtu duhet të nisë pastrimi i kësaj organizate.” – tha Faik Basha.
Ndërsa lidhur me urdhrin për orët e zgjatura në punë, Basha tha se është i jashtëligjshëm, ku punonjësit e Policisë do punojnë 12 orë pa pasur kushte.
“Ai është një formular që është munduar ti përshtatet kodit të punës, ku në raste emergjence punonjësit duhet të punojnë me orë të zgajtura. Futja e një formulari dhe detyrimi për të punuar 12 orë punonjësit e policisë me kushtet më ekstremen që i kanë pajisur i rëndon jashtëzakonisht kushtet e plotësimit të detyrës së këtyre punonjësve. Për mua është një urdhër që vendos kundër ligjit, nuk mund ti detyrosh punonjësit të punojnë 12 orë pa papaguar në kushte ekstreme. Mendoj se ky është një urdhër i jashtëligjshëm.” – tha Faik Basha.
