Kreu i PD-së, Sali Berisha ka publikuar një video në rrjetet sociale në momentin kur socialistët braktisin komisionin hetimor parlamentar të hetimit të koncesioneve në shëndetësi si check up dhe sterilizimi.
Në video dëgjohet deputeti socialist Plarent Ndreca, teksa ofendon me fjalët injorantë dhe idiotë kryetaren e komisionin, Albana Vokshi dhe deputetët e tjerë të opozitës.
Sipas Berishës, Ndreca largohet për të tentuar të fshehë faktin e raportuar nga audituesi i KLSH z. Zeqiri në lidhje me raportet e auditit të KLSH në kohën që Ndreca ka qenë krahu i djathtë, i besuari i Lindita Nikollës që e emëroi Sekretar të Përgjithshëm të Ministrisë së Arsimit.
Lideri demokrat shkruan se kryeministri Edi Rama i tmerruar nga e vërtetat urdhëron deputetët që të braktisin mbledhjen, teksa përmend dhe konfliktin e interesit të Milva Ekonomit dhe Plarent Ndrecës.
Postimi i plotë:
Rama, i tmerruar nga të vërtetat që po zbardhen për vjedhjen e parave të shëndetit nëpërmjet koncesioneve në shëndetësi, urdhëron deputetët e PS të bojkotojnë mbledhjet e Komisionit Hetimor për Koncesionet e Check-up dhe Sterilizimit.
Për të bllokuar transparencën, për të fshehur vjedhjet kriminale, Rama ka vendosur në Komision Milva Ekonomin, që në pozicionin e zëvendësministres ka drejtuar grupet e punës për të dy këto koncesione. Jo vetëm kaq, por Znj. Ekonomi ka firmosur kontratën financiare të check-up të Vilma Nushit, vetëm pak ditë pas emërimit në krye të Fondit të Sigurimit të Detyrueshëm Shëndetësor.
Në komisionin hetimor, Rama ka vendosur nënkryetar, avokatin e sterilizimit Plarent Ndreca.
Të nderuar qytetarë, dëgjojeni fjalorin fyes të Plarent Ndrecës ndaj Kryetares së Komisionit znj. Vokshi dhe deputetëve të opozitës ndërkohë që largohej duke tentuar të fshehë faktin e raportuar nga audituesi i KLSH z. Zeqiri në lidhje me raportet e auditit të KLSH në kohën që Ndreca ka qenë krahu i djathtë, i besuari i Lindita Nikollës që e emëroi Sekretar të Përgjithshëm të Ministrisë së Arsimit. Në këto raporte, Ndreca është ngarkuar me përgjegjësi për abuzimet në Ministrinë e Arsimit.
