Pas një orë e gjysmë në luftë me flakët është lokalizuar zjarri i përmasave të jashtëzakonshme që ra pasditen e sotme në tregun e rrobave të përdorura në lagjen Qafë Hardhie të Shkodrës. Për pasojë janë dëmtuar disa banesa dhe janë shkaktuar dëme të shumta materiale. Në një deklaratë për mediat kryebashkiaku Benet Beci dhe prefektja Majlinda Angoni thanë se për “shkak të katrahurës urbanistik”, ka qenë e vështirë ndërhyrja e zjarrfikësve, ndërkohë që rreziku tashmë është shmangur.
“Sapo është stabilizuar situata. Ka një orë gjysmë që është një luftë e vërtetë për të menaxhuar dhe marrë nën kontroll situatën e zjarrit. Mendoj se tani nuk ka më rrezik, jam i gëzuar që nuk kemi problem, dëme në njerëz, ka dëme materiale. E gjithë situata ka qenë shumë e rëndë. Falënderoj zjarrfikëse të Lezhës, Vaut të Dejës, Ulqinit e Tivarit. Dua të theksoj se kjo situatë ku zjarrfikëset nuk kishin mundësi të futen, ku gjithë kjo katrahurë urbanistike ka qenë një shqetësim i madh. Duhet të mendojmë seriozisht si duhet të kujdesemi nga këto situata të jashtëzakonshme. Kemi akoma punë për të pastruar situatën. Lajm i mirë është që s’kemi dëme në njerëz dhe situata e zjarrit është nën kontroll”.
Sa u përket banesave të djegura nga zjarri, Beci tha se grupet e vlerësimit do të jenë në terren do të ndiqet dhe problemi se çfarë ka ndodhur.
“Grupet e vlerësimit do të jenë në terren, do të ndiqet dhe problemi çfarë ka ndodhur. Instancat janë të gatshme për këtë situatë. Organizimi ka qenë i mirë, që mori nën kontroll shpejt situatën. Një zjarr me përmasa të jashtëzakonshme. Nuk ka pasur në Shkodër një rrezik kaq të madh”.
Edhe prefektja Angoni tha se kjo ka qenë një situatë e paprecedentë në Shkodër, që kërkoi ndërhyrjen e emergjencave civile.
