Një shqiptar është arrestuar në Australi me akuzën se po planifikonte sulme terroriste në Brisban. Sipas mediave vendase, personi i dyshuar si terrorist, quhet Agim Kruezi, 23 vjeç, i lindur në Australi, por me origjinë shqiptare.
Sipas hetimeve, Kruezi kishte planifikuar të ndërmerrte një sulm terrorist në Logan të Brisban dhe po priste që në ditët në vazhdim ta kryente atë. Ai ishte në pritje të një sasie të madhe municionesh.
Ditën e djeshme, Kruezi doli për herë të parë para gjykatës australiane ku iu zyrtarizuan 15 akuza, më së shumti për terrorizëm.
Deri më tani, autoritetet ende nuk kanë zbuluar vendin se ku do të zhvillohej sulmi terrorist.
Së bashku me shqiptarin është arrestuar edhe një person tjetër. Ndaj tij rëndojnë akuza si lidhje me ISIS-in, rekrutim xhihadistësh, armëmbajtje pa leje, transport i paligjshëm i tyre nga Sidnei në Logan dhe përgatitje të akteve terroriste.
Hetimet kanë treguar se shqiptari nuk kishte pasaportë australiane dhe pse kishte lindur atje. Ai kishte aplikuar në nëntor të vitit 2013.
