Gazetari Ferdinant Dervishi ka dhënë detaje lidhur me gjendjen e avokatit Sokol Mëngjesit dhe arsyet e sulmit ndaj tij, ku si organizator dyshohet Dritan Nano.
Në emisionin “Top Story”, gazetari Dervishi tha se Mëngjesi u sulmua barbarisht pasi pala tjetër nuk respektoi marrëveshjen mes tyre dhe nuk e pagoi avokatin për çështjen që ai kishte përfaqësuar për ta.
Ai tha se avokati Mëngjesi është një personazh korekt që beson tek instrumentet e shtetit, ndryshe nga pala tjetër që vendosi ta frikësonte.
“Ka thyer kafkën dhe ka dëmtuar trurin. Ata shpresojnë të përmirësohet situata dhe të kalojë në normalitet, është një ngjarje që ka tronditur një opinion të tërë, është goditur një personazh që futet në nivelin e njerëzve korrekt, e njerëzve që besonte te instrumentet e shtetit të vet, kishte një konflikt dhe filloi ta zgjidhte duke besuar shtetin e vet. Pala tjetër nuk po respektonte shtetin, ky kishte fituar një çështje për palën tjetër dhe ata nuk e kishin paguar, ata e zgjidhën duke e frikësuar”-u shpreh gazetari Dervishi.
Gazetari Ferdinant Dervishi, më tej ngriti shqetësimin se me sa shumë guxim arritën katër autorët të pa maskuar, në mes të Tiranës të sulmonin barbarisht një avokat të njohur.
Ai tha se shteti duhet t’i tregojë qytetarëve se në një rast të tillë kur sulmohet një personazh i njohur, reagimi do jetë shumë i fortë dhe siç tha gazetari, “4 autorëve do t’i shkatërrohet jeta”.
“Kanë vepruar si grup kriminal, e kanë ndjekur se ku shkon gjatë ditës dhe kanë menduar orarin kur çon fëmijën në kopsht. Ajo që më habit, pse shteti nuk e ka atë forcën sa ti diktojë qytetarit që këto histori përfundojnë shumë keq. Kemi rastin e Azem Hajdarit, kur godet shumë lart, do të të qepet shteti me 700 breza. Ky është personazh publik, nuk ka mundësi mos ta njihnin ata, e dinin shumë mirë, por si ka mundësi që kanë aq shumë guxim. Të pamaskuar, ku e gjetën guximin. Si ka mundësi që ne si shoqëri, shteti nuk i tregon dot qytetarëve të vet që në një rast të tillë, reagimi do jetë shumë i fortë, problemi është që ky njeriu, ata djem e kanë shkatërruar jetën e tyre. Nëse do akuzojmë shtetin, pse nuk i tregon dot shoqërisë, kujdes mos ndërmerr aventura të tilla.”-u shpreh gazetari.
