Avokati i Mirel Mërtirit, Sokol Mëngjesi është bërë sot subjekt i dhunës, duke u goditur me levë dhe grushte nga persona të paidentifikuar.
Ngjarja mësohet të ketë ndodhur në zonën e ish-Bllokut në Tiranë. Policia bën me dije se avokati Sokol Mëngjesi është dërguar menjëherë në spital për dhënien e ndihmës mjekësore dhe ndodhet nën kujdesin e mjekëve
Sipas uniformave blu është ngritur një grup hetimor për të zbuluar motivet e ngjarjes. Gjithashtu policia po punon për identifikimin dhe kapjen e autorëve.
Vlen të theksojmë që Sokol Mëngjesi gjithashtu është edhe avokati i ish-kryeministrit Sali Berisha në hetimet e SPAK për dosjen ‘Partizani”.
“Sot, rreth orës 08:50, në zonën e ish-Bllokut në Tiranë, persona ende të paidentifikuar kanë goditur shtetasin S. M., me profesion avokat. I dëmtuari është dërguar menjëherë në spital për dhënien e ndihmës mjekësore dhe ndodhet nën kujdesin e mjekëve. Gjendja e tij shëndetësore është e stabilizuar. Drejtoria Vendore e Policisë Tiranë dhe strukturat e Policisë së Shtetit janë angazhuar për identifikimin dhe kapjen e autorëve”, njofton policia.
- Kush është Mirel Mërtiri, pronar i inceneratorëve që akuzohet për vjedhjen e milionave eurove
Mirel Mërtiri është konsideruar shpesh në media si “njeriu hije” i inceneratorëve.
Struktura e Posaçme Anti-Korrupsion është e bindur se Mirel Mërtiri është pronari faktik i kompanive ë siguruan kontratat qindra milionë euro për impiantet e përpunimit të mbetjeve në Elbasan, Fier dhe Tiranë.
Për SPAK-un, pronari real i inceneratorëve është Mirel Mërtiri, për të cilin u kërkua 10 vjet burgim për akuzat e “korrupsionit aktiv të zyrtarëve të lartë” dhe “pastrim të produkteve të veprës penale”. Kujtojmë që Mirel Mërtiri është miku i ngushtë i ish zv/kryeministrit Arben Ahmetaj i shpallur në kërkim ndërkombëtar për aferën e inceneratorëve.
