Një efektiv policie 28-vjeçar, Novruz Cenalia, ka mbetur i vrarë ditën e sotme në Fier.
Ngjarja ka ndodhur rreth orës 13:15, në fshatin Baltëz ku dyshohet se gjatë një konflikti të çastit, Asllan Mernica ka vrarë me armë zjarri Novruz Cenaliajn, punonjës policie i Forcës së Posaçme “Shqiponja” të DVP Fier, jashtë shërbimi, por i veshur me uniformën e Policisë, pasi shkonte për të marrë shërbimin.
Mësohet se i ati i viktimës punonte në polici, në sallën operative.
- Identifikohet autori
Autori i krimit është identifikuar si Asllan (Azgan) Mernica.
Pas vrasjes së efektivit 28-vjeçar, autori mësohet të jetë larguar nga vendngjarja me një automjet në ngjyrë blu.
- Pistat e hetimit
Në njoftimin e policisë thuhet se vrasja dyshohet të ketë ndodhur gjatë një konflikti të çastit. Por burime mediatike bëjnë me dije se një nga pistat e hetimit është edhe hakmarrja, pasi babai i tij, po ashtu polic, ka vrarë një person 9 vite më parë.
“Rreth orës 13:15, në fshatin Baltëz, dyshohet se gjatë një konflikti të çastit, shtetasi A. M. ka vrarë me armë zjarri shtetasin N. C., punonjës policie i Forcës së Posaçme “Shqiponja” të DVP Fier, jashtë shërbimi, por i veshur me uniformën e Policisë, pasi shkonte për të marrë shërbimin.
Menjëherë në vendngjarje janë nisur shërbimet e Policisë, Forca Kombëtare e Sigurisë, Reparti Special “RENEA”, të cilat kanë rrethuar zonën dhe vijojnë punën për kapjen e autorit.”– njofton policia.
- Policia 30 000 euro shpërblim për këdo që ka informacion të vlefshëm për autorin
Policia e Shtetit kërkon ndihmën dhe bashkëpunimin e qytetarëve për lokalizimin e autorit të dyshuar të vrasjes, shtetasit Azgan Mernica, 23 vjeç, banues në fshatin Sulaj.
Kushdo që ka informacion të telefonojë në numrin pa pagesë 112, duke iu garantuar anonimatin. Për çdo informacion të vlefshëm, Policia e Shtetit vë në dispozicion shpërblimin 30 000 euro.
Ndërkohë, shërbimet e Policisë së Fierit, Forca Kombëtare e Sigurisë dhe Reparti Special “RENEA”, në drejtimin e Drejtorit të Përgjithshëm të Policisë së Shtetit, vijojnë veprimet operacionale në zonë, me qëllim kapjen dhe vënien në pranga të 23-vjeçarit.
Gjithashtu, në të gjitha akset rrugore lidhëse me qarkun Fier janë ngritur pika kontrolli.
Grupi hetimor, në drejtimin e Prokurorisë, po vijon veprimet në vendngjarje për të sqaruar dhe dokumentuar me prova ligjore rrethanat e rastit.
