Bayer Leverkusen vijon sezonin si i pamposhtur.
“Aspirinat” kanë arritur një tjetër fitore të madhe mbrëmjen e kësaj të enjteje, teksa kanë mundur në “Stadio Olimpico”, Romën me rezultatin 0-2 duke hedhur një hap të sigurt drejt finales së Europa League.
Nga një gol në secilën pjesë mjaftoi për djemtë e teknikut, Xabi Alonso, teksa ishte fillimisht Florian Wirtz, me një gol në minutën e 28’-të, të pjesës së parë të sfidës dhe në të 73’-të, “shkatërruesi” gjerman, Robert Andrich dyfishoi shifrat me një goditje spektakolare, nga jashtë zone, duke i dhënë djemve, të De Rossi goditjen e dytë.
Kujtojmë se “bileta” për në finalen e madhe, të Dublinit do të sigurohet vetëm pas sfidës së kthimit, që do të zhvillohet mbrëmjen e 8 majit, në “mitikun” gjerman, të “BayArena”, ku sërish favorit është skuadra e Xabi Alonsos.
Sfida tjetër mes Marseille dhe Atalantës përfundoi 1-1. Në “Velodrome”, golit të Scamaccas iu përgjigj Mbema. Titullar për bergamaskët ishte edhe Berat Gjimshiti, që zhvilloi një ndeshje të mirë.
