Kryetari i Grupit Parlamentar të PD-së, Gazment Bardhi ka ftuar qytetarët në protestë ditën e premte kundër Bashkisë së Tiranës, të cilën e quan “grup të strukturuar kriminal” pas aferës “5D”, ku 5 drejtorë të Veliajt përfunduan në burg.
“Të premten, 26 Prill 2024, ora 11:00, të protestojmë kundër ngritjes në sistem shtetëror të mirëstrukturuar të hajdutërisë ndaj taksave tona”, shkruan Bardhi teksa kërkon dorëheqjen e Veliajt.
Burime konfirmojnë se Mariglen Qatos, Redi Mollës dhe Taulant Tushës iu është komunikuar akuza për veprat penale korrupsion pasiv dhe mosdeklarim pasurie, ndërsa mësohet se vijojnë hetimet pasi me komunikimin e akuzave nuk ka përfunduar ende faza hetimore për mbledhjen e fakteve dhe provave nga SPAK.
Kujtojmë se Redi Molla, ish drejtori i UKT-së, bashkë me Mariglen Qaton, ish drejtor i Inspektoriatit të Mbrojtjes së Territorit (IMT) në Bashkinë e Tiranës, u arrestuan nga SPAK, pasi akuzohen se nëpërmjet kompanisë “5D Konstruksion” sh.p.k., të drejtuar indirekt prej tyre, kanë përfituar dhjetra miliona euro para publike, përmes prokurimeve të Bashkisë së Tiranës dhe institucionet vartëse të saj.
Reagimi i plotë i Gazment Bardhit:
Bashkia e Tiranës nuk mund të jetë grup i strukturuar kriminale. Qytetarët e Tiranës nuk mund dhe nuk duhet ta pranojnë këtë si normalitet, kur shohin sesi vetëm nga kontrolli i 1 % të procedurave të prokuruara, rezulton se janë vjedhur në bashkëpunim 100 % e fondeve.
Tirana ka shumë probleme dhe buxheti i qytetit duhet të përdoret për zgjidhjen e halleve dhe problemeve të qytetarëve, për shërbime ndaj tyre, për punë në dobi të mirëqenies së qytetarëve.
Të premten, 26 Prill 2024, ora 11:00, protestojmë kundër ngritjes në sistem shtetëror të mirëstrukturuar të hajdutërisë ndaj taksave tona.
Erion Veliaj nuk mund të fshihet, por duhet të mbajë përgjegjësi. Përgjegjësia fillon duke u dorëhequr dhe duke u përballur me drejtësinë si qytetar i zakonshëm i Tiranës!
