Kreu i Partisë së Lirisë, Ilir Meta këtë të shtunë është ndalur në qytetin e Lezhës, për riorganizimin e forcës politike që ai drejton, teksa pas një aktiviteti sportiv është prononcuar edhe për gazetarët lokalë.
Meta u shpreh se SPAK dëshiron të hyjë në lojë politike, ndërsa theksoi se nuk mbështet ato institucione që merren me politikë në funksion të Edi Ramës.
Ai iu drejtua dhe ndërkombëtarëve, ku tha se duhet të kenë turp që nuk reagojnë kur Edi Rama urdhëron SPAK për të izoluar dhe akuzuar Sali Berishën që nuk ka bërë asnjë shkelje ligji.
I pyetur nëse reagimet e tij të ashpra ndaj SPAK janë rezultat i frikës së tij nga drejtësia, Meta tha se “rrethimi i vogël i Ilir Metës ka mbaruar dhe rrethimi i madh ndaj mafias në pushtet sapo ka nisur”.
“SPAK-u dëshiron të hyjë në lojë politike, të vijë të garojë si sot u ndeshëm ne këtu në Lezhë. Në rast se dëshiron t’i qëndrojë kushtetutën të bëjë punën e tij, por është shumë larg pritshmërive. Ne mbështesim reformën me 140 vota, nuk mbështesim ato institucione që merren me politikë në funksion të Edi Ramës. Turp të kenë të gjithë ndërkombëtarët që nuk reagojnë kur Edi Rama urdhëron SPAK dhe jep dhe akuza për Sali Berishën që nuk ka bërë asnjë shkelje ligji, por po izolohet pse Edi Rama terrenet sportive i ktheu në kantiere betoni. Ilir Meta ka qenë këtu, është këtu dhe do të jetë këtu. Frikë nga e vërtetat kanë ata që kujtojnë se me deklarata të blera McGonigalësh dhe me fëlliqësira që mbajnë cikma me vete do mund të shkatërrojnë pluralizmin politik. Më 27 prill e marrin përgjigjen të gjithë në pallatin e Kongreseve dhe më pas kudo. Rrethimi i vogël i Ilir Metës ka mbaruar, rrethimi i madh ndaj mafias në pushtet sapo ka nisur. Besëlidhja e Lezhës, 2 marsi , janë shtylla e Partisë së Lirisë”, tha Meta.
