Skënderbeu ka arritur të fitojë me rezultatin 0-2 përballë Kukësit në qytetin verilindor, në ndeshjen e vlefshme për javën e 32-të të Kategorisë Superiore.
Heroi i korçarëve në ndeshjen e sotme ishte 20-vjeçari Ermir Rashica, pasi shënoi një dobietë, duke i dhënë fitoren ekipit të tij.
Në minutën e ’32 të takimit, Rashica dërgoi topin në rrjetë nga pika e bardhë e penalltisë, pas një 11-metërshi të fituar nga Yuri Merlim, i cili u pengua në zonë. Ndërkohë, Kukësi kishte dy raste të mira për shënim në fraksionin e parë të lojës, por portieri Marko Alia i tha jo golit të verilindorëve.
Në pjesën e dytë, ishte sërish Ermir Rashica, i cili çoi topin në rrjetë në minutën e ’67, pas një krosimi në zonë nga Andrea Gerxho. Kukësi shënoi me Fejzaj në mituln e ’87, por goli u anulua nga VAR për pozicion të parregullt.
Pas këtij rezultati, Skënderbeu shpëton matematikisht nga rënia direkte nga Kategoria Superiore, ndërkohë që mban gjallë ende shpresat për një vend në “FInal Four”, pasi ndodhet në kuotën e 44 pikëve, dy më pak se Tirana, e cila fitoi përballë Erzenit dhe dy më pak edhe se Dinamo, e cila luan nesër përballë Partizanit.
Ndërkohë, Kukësi ngelet në vendin e fundit dhe me një fitore nesër të Teutës, bie edhe zyrtarisht nga Kategoria Superiore.
