Këshilltari për Çështjet Ekonomike në Partinë Demokratike, Dorian Teliti ka komentuar sërish ditën e sotme aferën “5D”, dhe vjedhjen e 30 milionë eurove nga kjo kompani.
Në një postim në rrjete sociale, Teliti shkruan se 30 milionë euro e korrupsionit 5D kushtojnë sa ndërtimi i 1200 banesave sociale, teksa kujton dhjetëra familje që janë pa shtëpi e në vështirësi ekonomike.
Më tej Teliti u bën thirrje qytetarëve ti bashkohen protestët ditën e nesërme para Bashkisë së Tiranës, për të kërkuar dorëheqjen e kryebashkiakut Veliaj, pas skandaleve që përfshinë Bashkinë e drejtuar nga ky i fundit.
Postimi nga Dorjan Teliti
Taksa 30 milionë euro e korrupsionit 5D kushton sa ndërtimi i 1200 banesave sociale.
Janë me mijëra familje të cilat presin strehimin e premtuar por kurrë të realizuar.
Janë me mijëra fëmijë të cilët mësimet e tyre i bëjnë në kushte skandaloze, në të ftohtë apo edhe duke u pikuar uji i shiut nga tavani mbi librat dhe fletoret e tyre të shkollës.
Janë me mijëra të moshuar, jeta e të cilëve shkurtohet cdo ditë e më shumë sepse jetojnë në kushte jashtë cdo standarti normal jeteseje.
Janë me mijëra ciftet e reja të cilat nuk guxojnë dot të nisin një jetesë bashkëshortore, sepse nuk kanë as lekët për të paguar qiratë e rritura ndjeshëm këto vite, e jo më të blejnë shtëpi.
❌Dhe kjo sepse ekipi drejtues i Bashkisë së Tiranës, në vend që të mendonte të ndërtonte banesa sociale për shtresat që kanë nevojë, mendonte si e si të gllabëronte miliona e miliona euro me procedura të sajuara e të kopsitura që në fillesë.
Nëse s’do kishim 5D që gllabëronte 30 milionë euro, me ato para do mund të ndërtonim plot 1200 apartamente për nevojtarët e qytetit tonë.
Ndaj, i bëj thirrje cdokujt, të strehë apo të pastrehë të Kryeqytetit tonë, ngrihuni dhe reagoni. ⏰Bashkë të gjithë, nesër ora 11.00, para Bashkisë Tiranë për të protestuar dhe kërkuar dorëheqjen e Kryebashkiakut që nuk di se c’janë banesat sociale e nevojat e qytetit e qytetarëve.
