AMP ka ekzekutuar masën e arrestit me burg të vënë nga Gjykata e Shkallës së Parë në Shkodër për Ndue dhe Mark Fikun, babë e bir.
Ndaj Ndue dhe Mark Fiku u hap një procedim penal në vitin 2023, për kultivim kanabisi dhe për shpërdorim detyre nga 70-vjeçari duke qenë kryeplaku i fshatit Pepsumaj në Vaun e Dejës. Më pas Agjencia e Mbikqyrjes Policore, bëri të mundur dokumentimin me prova ligjore të aktivitetit kriminal nga babai dhe djali 31-vjeçar dhe ekzekutoi urdhrin e prokurorit për vënien në arrest në burg për dy shtetasit.
70-vjeçari Ndue Fiku, me detyrë Kryeplak i zonës Pepsumaj, akuzohet për “Kultivim të bimëve narkotike“ dhe “Shpërdorimit të detyrës“. Ndërkohë, djali i tij Mark Fiku akuzohet për “Kultivim të bimëve narkotike” në bashkëpunim.
“Agjencia e Mbikëqyrjes Policore (Rajoni Shkodër-Lezhë) ekzekutoi urdhrin e prokurorit mbi vendimin penal të Gjykatës së Shkallës së Parë të Juridiksionit Përgjithshëm Shkodër për caktimin e masës së sigurimit personal “Arrest në burg”, në bazë të hetimeve të thelluara nga AMP-ja, në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Shkodër, në funksion të hetimit të procedimit penal të vitit 2023, regjistruar për veprat penale “Kultivimi i bimëve narkotike” dhe “Shpërdorimi i detyrës”.
Sa më sipër, Agjencia e Mbikëqyrjes Policore ka bërë të mundur dokumentimin me prova ligjore të përfshirjes në këtë aktivitet kriminal të kultivimit të bimëve narkotike nga shtetasit:
– N. F., 70 vjeç, me detyrë Kryeplak i zonës Pepsumaj, i dyshuar për kryerjen e veprës penale të “Kultivimit të bimëve narkotike“ dhe “Shpërdorimit të detyrës“.
– M. F., 31 vjeç, i dyshuar për kryerjen e veprës penale të “Kultivimit të bimëve narkotike” në bashkëpunim.“- njofton policia.
Vijojnë hetimet për dokumentimin e veprimtarisë së punonjësve të policisë në këtë aktivitet kriminal.
