Nga Boldnews.al
Prokuroria e Tiranës ka kërkuar konfiskimin e një apartamenti dhe një garazhi, për të cilat beson se ish-zyrtarja e Ministrisë së Financave, Alda Klosi, ka tentuar t’i fshehë duke përdorur një kushëririn e saj.
Në dosjen hetimore të konsultuar nga “Boldnews.al” rezulton se, fillimisht, dy pasuritë e paluajtshme janë porositur pranë një kompanie ndërtimi nga kushëriri e Klosit, Evis Zh, për një shumë totale prej rreth 81 mijë euro.
Më pas, apartamenti me sipërfaqe 90 metra katrorë dhe vend-parkimi me sipërfaqe 20 metra katrorë, iu kaluan në pronësi Altin Klosit, ish-bashkëshortit të Alda Klosit, me justifikimin e shlyerjes së një borxhi prej mbi 80 mijë euro që kushëriri i kishte familjes së zyrtares.
Hetimet e Prokurorisë konstatuan se Alda Klosi dhe ish-bashkëshorti i saj nuk kishin pasur mundësi financiare për të krijuar një sasi parash në vlerën 80 mijë euro, e cila pretendohet se i është dhënë hua të afërmit.
Për këtë arsye, Prokuroria e Tiranës vlerëson se veprimet e huadhënies janë fiktive, me qëllim fshehjen e burimit të paligjshëm të parave të Alda Klosit për blerjen e këtyre dy pasurive.
Gjithashtu, Prokuroria kërkon nga gjykata konfiskimin e mbi 500 mijë eurove, të cilat pastruesja Rozeta Dobi vodhi në shtëpinë e Alda Klosit. Edhe për këtë shumë nuk u gjet burim i ligjshëm financiar.
Në listën e pasurive që kërkohet të konfiskohen është edhe një automjet, me vlerë 8 mijë euro, për të cilin gjithashtu nuk gjendet burimi.
Skema për “fshehjen e pasurive”
Mes Shkurtit dhe Korrikut të vitit 2019, kushëriri i Alda Klosit, Evis Zh, nënshkruan kontrata premtim-shitje me shoqërinë ndërtimore “Brilant” për një apartament me sipërfaqe 95 metra katrorë dhe një garazh 20 metra katrorë, të ndodhur në zonën e ish-21 Dhjetorit, pranë Fakultetit të Inxhinjerisë së Ndërtimit.
Në bazë të këtyre kontratave, blerësi Evis Zh., paguan shumën 76.300 euro për apartamentin dhe 5 mijë euro për vend-parkimin. Pagesat janë kryer në gjatë vitit 2020.
Disa muaj pas këtyre pagesave, konkretisht në janar 2021, Evis Zh., nënshkruan një deklaratë noteriale, në të cilën pranon se i ka borxh Alda Klosit dhe ish-bashkëshortit të saj, Altin Klosi, shumën prej 81 mijë euro, të cilat ua ka marrë hua për blerjen e këtyre dy aseteve.
Në kushtet kur kushëriri nuk ka pasur mundësi t’u kthejë borxhin, ai ka shprehur vullnetin e tij që apartamenti dhe garazhi që kishte porositur tek shoqërias “Brilant”, t’i kalonin në pronësi Alda dhe Altin Klosit.
Në të njëjtën ditë me këtë deklaratë borxhi, bashkëshortët Klosi nënshkruajnë kontratën për apartamentin dhe garazhin me shoqërinë ndërtimore dhe shndërrohen automatikisht në pronarë të këtyre aseteve.
Referuar këtyre kontratave, Prokuroria e Tiranës ka kryer hetime mbi mundësitë e bashkëshortëve Klosi për të krijuar shumën 81 mijë euro, që pretendohet se i ishin dhënë borxh kushëririt Evis Zh.
Në këtë kuadër, prokurorët kanë konsultuar të dhënat e vetëdeklaruara nga Alda Klosi pranë Inspektoratit të Lartë të Deklarimit dhe Kontrollit të Pasurive e Konfliktit të Interesave (ILDKPKI), bazuar në detyrimin e saj si zyrtare e lartë në administratën shtetërore.
Nga shqyrtimi i të dhënave, rezultoi se Alda Klosi dhe bashkëshorti i saj, jo vetëm që nuk e kanë deklaruar si gjendje 81 mijë euro, por as nuk kanë pasur mundësi reale për krijimin e kësaj shume me të ardhurat e ligjshme.
Dënimi i Alda Klosit
Alda Klosi u dënua pak javë më parë me 18 muaj burgim për “fshehje të pasurisë”. Ajo nuk qëndroi gjatë në burg, pasi e shleu dënimin me periudhën e paraburgimit.
Klosi, e cila ka punuar si zyrtare e lartë në Ministrinë e Financës dhe më tej në atë të Rindërtimit, u arrestua në shkurt të vitit 2023, në vijim të një hetimi për vjedhjen e një shume të konsiderueshme parash në shtëpinë e saj nga pastruesja Rozeta Dobi.
Pastruesja Dobi dhe djali i saj u dënuan përkatësisht nga 4.8 dhe 3.4 vjet burgim, për akuzën e vjedhjes me pasoja të rënda.
Policia gjeti mbi 500 mijë euro në shtëpinë e familjes Dobi, pjesa më e madhe e të cilave të fshehura në tubin e sobës.
