Një 38-vjeçar është arrestuar në Lushnje pasi ka thyer masën e sigurisë.
Gjatë kontrollit fizik, 38-vjeçarit iu gjetën dhe iu sekuestruan 21 doza lënde të dyshuar narkotike kokainë, të cilat ai dyshohet se do t’i shiste në afërsi të shkollave dhe në ambiente të ndryshme.
Gjithashtu sipas policisë 38-vjeçari është përfshirë edhe në një konflikt me disa persona të tjerë ku mbeti i plagosur një 29-vjeçar, gjithashtu u dëmtuan lehtë edhe një 28-vjeçar dhe një 19-vjeçar.
Njoftimi i policisë:
Gjatë kontrollit fizik shërbimet e Policisë së Lushnjës i gjetën dhe sekuestruan një sasi lënde narkotike kokainë, të ndarë në doza gati për shitje. Pas një konflikti të ndodhur ditën e djeshme, në Lushnjë, ku mbeti i plagosur lehtë me mjet prerës shtetasi D. S., 29 vjeç, dhe patën dëmtime të lehta shtetasit , 28 vjeç dhe 19 vjeç, falë ndërhyrjes së menjëhershme të shërbimeve të Komisariatit Lushnjë, parandalohet një ngjarje që mund të kishte pasoja të rënda, dhe bëhet e mundur kapja e 2 prej autorëve të këtij konflikti.
Specialistët për Hetimin e Krimeve të Komisariatit të Policisë Lushnjë, në bashkëpunim me Forcën e Posaçme “Shqiponja”, të DVP Fier, kapën në flagrancë shtetasin 38 vjeç, banues në Lushnjë, pasi ky shtetas kishte thyer masën e sigurisë “Arrest në shtëpi”, të vendosur nga Gjykata e Gjirokastrës dhe ishte një nga autorët e një konflikti me sende të forta dhe me mjet prerës. Shërbimet e Komisariatit të Policisë Lushnjë, gjatë kontrollit fizik, i gjetën dhe sekuestruan 21 doza lënde të dyshuar narkotike kokainë, të cilat ky shtetas dyshohet se do t’i shiste në afërsi të shkollave dhe në ambiente të ndryshme.
Në vijim të veprimeve procedurale, specialistët për Hetimin e Krimeve të Komisariatit të Policisë Lushnjë, në bashkëpunim me specialistët për Hetimin e Narkotikëve, bënë arrestimin e këtij shtetasi për veprat penale “Plagosja e lehtë me dashje”, kryer në bashkëpunim, “Prodhimi dhe shitja e narkotikëve” dhe “Largimi i të burgosurit nga vendi i qëndrimit”.
Gjithashtu, në vijim të veprimeve për dokumentimin ligjor të rrethanave të konfliktit, specialistët për Hetimin e Krimeve të Komisariatit të Lushnjës referuan materialet në Prokurori, ku nisi procedimi në gjendje të lirë për shtetasin 39 vjeç, pasi dyshohet të jetë një nga autorët e këtij konflikti, dhe shpallën në kërkim 2 shtetas të tjerë, të dyshuar si autorë të plagosjes së 29-vjeçarit, konkretisht shtetasit 44 vjeç, dhe 36 vjeç, të dy banues në fshatin Karbunarë, Lushnjë. Po punohet për kapjen e këtyre shtetasve. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.
