Kryetari i Bashkisë së Tiranës, Erion Veliaj ka reaguar lidhur me protestën që u mbajt paraditen e kësaj të premte para Bashkisë së Tiranës, ku qytetarët kërkuan dorëheqjen e tij, pas aferës korruptive “5D”.
Gjatë fjalës së tij, në takimin me administratorët e Njësive Administrative të Tiranës, kryebashkiaku Veliaj në vend që të jepte llogari mbi tenderat miliona euro të përfituara nga drejtorët e tij, ka hedhur akuza drejt fëmijëve të ish-kryeministrit Berisha, Argita Malltezit dhe Shkëlzen Berishës, teksa i ka quajtur si njerëz që s’mund t’i jepet bashkia “që të vijnë ta hedhin në erë si Gërdecin”.
Veliaj ka zgjedhur të zhvendosë vëmendjen drejt familjes Berisha, duke “kyçur” kështu gojën lidhur me aferën “5D” ku u shpreh se rasti është ende nën hetim.
Reagimi:
“Kur shikoj që protestën e drejton Argita me Shkëlzenin, përballë Bashkisë së Tiranës, për diçka që është ende në hetim, ku ende nuk është bërë seanca e parë në gjykatë, dhe kur mendoj se pinjollët e familjes që i kanë shkaktuar më shumë të zeza këtij vendi, që kanë veshur më shumë gra me të zeza, duke filluar nga Piramidat, te vëllavrasja e 97-s, te 21 Janari dhe Gërdeci… Argita me Shkëlzenin thonë: “Ikni ju të vijmë ne”! Me vota nuk bëhet fjalë fare të vijnë dhe as nuk kanë për të ardhur ndonjëherë.
Pra, t’i lësh Bashkinë e Tiranës Shkëlzenit dhe Argitës, ata ta hedhin në erë siç bënë me Gërdecin. Kanë shumë kurajo që dalin, teksa vetë janë të paditur në SPAK, vetë janë me masa sigurie, vetë thërrasin: “Lironi babin”. Kanë kurajo për një gjë, se hetimi nuk ka përfunduar ende, ne duhet ta shohim në gjykatë nëse do të provohet ose pretendimi i prokurorisë, ose pafajësia e ish-kolegëve tanë. Por, ta dëgjosh këtë nga goja e Argitës dhe Shkëlzenit, që vranë njerez, dhe të thuash “të lëmë bashkinë që të vijnë ta hedhin në erë si Gërdecin”, kjo është ku thërret qameti. Kjo është t’ia fyesh inteligjencën njerëzve në mënyrë spektakolare”.
Kujtojmë se pak ditë më parë me urdhër të SPAK u arrestuan dy drejtorët e bashkisë Tiranë Redi Molla dhe Mariglen Qato, që ishin pronarë “de facto” të kompanisë “5D”.
Kjo e fundit ka përfituar më shumë se 6 miliardë lekë të vjetra tendera nga Bashkia e Tiranës, Ujësjellës-Kanalizime Tiranë, Tirana Parking dhe Klubi Sportiv “Tirana”.
Sipas SPAK-ut, për 4 vite që Redi Molla ka ushtruar funksionin e Drejtorit të Përgjithshëm të shoqërisë “Ujësjellës Kanalizime Tiranë” ka shpallur fituese tenderash kompaninë që ai dhe drejtori tjetër Mariglen Qato, kishin themeluar vetë.
