Moszbatimi i vendimit të Gjykatës Kushtetuerse për mandatin e deputetes ish-ministre “investitore strategjike”, Olta Xhaçka ka përplasur opozitën dhe mazhorancën në mbledhjen e Konferencës së Kryetarëve. Kryetarja e Kuvendit, Lindita Nikolla prej më shumë se një viti po refuzon me përbuzje të zbatojë një vendim të Kushtetuese, që e detyron atë ti dërgojë për shqyrtim kërkesën e opozitës për djegjen e mandatit të Xhaçkës.
Kreu i grupit parlamentar të PD-së, Gazment Bardhi ka kërkuar gjatë mbledhjes që të zbatohet vendimi i Gjykatës Kushtetuese dhe çështja të kalojë në Kuvend, duke shtuar se maxhoranca ka nxjerrë justifikime absurde nga janari 2023 deri më sot. Ai theksoi se mazhoranca kërkon të zvarrisë çështjen, duke e kthyer edhe njëherë tek Këshilli i Mandateve, kur “vendimet e këtij Këshilli kanë qenë subjekt i shqyrtimit ne Kushtetuese”.
Xhaçka akuzohet se ka shkelur Kushtetutën, duke përfituar si deputete të mira publike, që kur bashkëshorti i saj, Artan Gaçi, fitoi të drejtën e përdorimit të bregdetit për 30 vite falë një vendimi qeverie.
Rasti është kthjellësisht i pastër dhe për precedentë të tillë Kushtetuesja i ka hequr më parë mandatin e deputetit, Ilir Beqes dhe Koço Kokëdhimës. Pikërisht për këtë arsye Lindita Nikolla thjeshtë e mban në sirtar prej më tepër se një viti kërkesën dhe nuk e çon atë për gjykim.
Kryeparlamentarja Lindita Nikolla deklaroi gjatë mbledhjes se Këshilli i Mandateve do të mblidhet të hënën (8 prill) dhe do të vijohet me procedurën.
Bardhi: Të kujtoj se mos zbatimi i vendimeve te Gjykatës Kushtetuese, përbën vepër penale. Në shkelje të Kushtetutës ju si kryeparlamentare dhe si maxhorancë po refuzoni të zbatoni vendimin e Gjykatës Kushtetuese. Keni nxjerr justifikime absurde nga janari i vitit 2023 e deri më sot. Kjo praktikë e Gjykatës Kushtetuese, është praktikë e njohur, por ju bëni sikur nuk e kuptoni dhe e zvarrisni. Doni ta ktheni edhe një here tek Këshilli i Mandateve ku vendimet e këtij këshilli kanë qenë subjekt i shqyrtimit ne Kushtetuese.
Nikolla: Të hënën do të mbledhim Këshillin e Mandateve për këtë çështje për të vijuar procedurën.
Bardhi: Procedura thotë se çështja do të duhet të vijë në Kuvend. Por ju kërkoni ta zvarrisni..
