Janë zbardhur detaje të reja nga aksidenti tragjik i regjistruar në orët e para të mëngjesit të kësaj të marte, në aksin rrugor Këlcyrë- Përmet, ku humbën jetën 8 persona.
Burime bëjnë me dije se automjeti tip “Mercedes Benz” ishte marrë me qira nga shtetasi shkodran, me të cilin po transportonte 7 klandestinë nga vendet e treta. Ai ka qenë duke udhëtuar nga pika kufitare e Tre Urave në drejtim të Këlcyrës.
Dinamika e ngjarjes është ende e paqartë, por dyshohet se patrulla e policisë pikasi mjetin e dyshimtë afër Këlcyrës rreth orën 02:00, por drejtuesi i ‘Benz’-it refuzoi që të ndalonte për kontroll. Shoferi nga Shkodra, cili po udhëtonte drejt Këlcyrës është kthyer në rrugë dhe ka tentuar të arratiset drejt Përmetit.
Pas ndjekjes nga policia, duket se automjeti ka humbur gjurmët, ndërsa pas shumë kontrolleve u verifikua se ‘Benz’-i kishte përfunduar në shtratin e lumit Vjosë.
Në momentin e daljes nga rruga pranë kthesës së Kuqarit, mendohet të ketë qenë me shpejtësi rreth 180 km në orë. Mjeti ka fluturuar në linjë ajrore rreth 200 m dhe më pas është përmbysur në një shpat të pjerrët buzë Vjosës. Shpejtësia e mjetit ka vijuar të jetë e lartë duke e shtyrë atë edhe gati 100 m të tjerë.
Pasagjerët të gjithë shtetas të huaj kanë dalë nga automjeti në momente të ndryshme dhe kanë humbur jetën në vend.
Rreth dinamikës së aksidentit, ka folur edhe Drejtori i Policisë së Gjirokastrës, Ardian Çipa, i cili në një prononcim për mediat shpjegoi se mjeti me emigrantë ka qenë duke lëvizur me shpejtësi tej normave dhe patrulla e policisë i ka bërë shenjë që të ndalojë.
“Policia ka hasur një mjet që po vinte me shpejtësi tej normave të lejuara. Në përpjekje e sipër për t’i bërë shenjë për të ndaluar, automjeti është kthyer dhe është nisur me drejtim nga qyteti i Përmetit. Patrulla e policisë me automjetin e vet e ka ndjekur deri në afërsi të vendit të ngjarjes, ka informuar sallën operative për mjetin që ishte larguar në drejtim të Përmetit me shpejtësi. Rreth orës 03:55, duke qenë se nuk është konstatuar automjeti, patrulla ka lëvizur drejt Përmetit duke marrë edhe kontakte me qytetarët që i ka pyetur nëse kanë parë një mjet të tillë. Kanë nisur inspektimin e zonës dhe ka parë shenja të aksidentit rrugor dhe ka parë automjetin që ka rënë në anë të lumit Vjosa. Paraprakisht dyshohet se drejtuesi i mjetit që jemi ende duke punuar për ta identifikuar. Personat e tjera dyshohet se duhet të jenë emigrantë të paligjshëm. Nuk japim dot një konkluzion sa i përket shpejtësisë së automjetit. Numri i kufomave është i madh dhe si rezultat ka kryerjen e shumë ekzaminimeve për të marrë dhe administruar prova për identifikimin e personave dhe sqarimin e rrethanave”, – tha Çipa.
