Disa persona ende të paidentifikuar kanë vjedhur transformatorin e rrjetit elektrik në stacionin e ujësjellësit në Bërdicë të Shkodrës.
Si pasojë e kësaj grabitjeje, kanë mbetur pa ujë rreth katër mijë banorë të katër fshatrave të Bërdicës. Policia e Shkodrës ka nisur hetimet për identifikimin dhe kapjen e autorëve.
Inxhinieri i shoqërisë rajonale të ujësjellës kanalizime në Shkodër Lazër Pema thotë se dëmi i shkaktuar është i konsiderueshëm por shumë shpejt do merren masa për rikthimin e ujit të pijshëm në katër fshatrat e Bërdicës.
Pema ka bërë një apel për gjithë banorët e kësaj zone por edhe për gjithë të tjerët që të mos dëmtojnë stacionet e ujësjellësve duke qenë se ky është një rast i përsëritur. Brenda tre viteve të fundit ky transformator elektrik në stacionin e ujësjellësit të Bërdicës është vjedhur tri herë.
