Kreybashkiaku socialist i Rrogozhinës, Edison Memollla ka reaguar më anë të një postimi në rrjetet sociale, pas u mor nën hetim nga SPAK pas kallëzimit të Partisë Demokratike.
Ka dyshime se Memolla ka dëmshpërblyer të afërm të tij në vlera të konsiderueshme, si dhe ka dhënë dëmshpërblime dy herë për të njëjta banesë të dëmtuara nga tërmeti.
Në reagimin e tij, Memolla shkruan se edhe pse ndaj tij është hedhur baltë, nuk ka dalë hapur kundër tyre pasi do t’i përgjigjet drejtësisë, por shton se tanimë përveç tij, po baltoset edhe familja e tij, me akuza të rënda dhe të pafalshme.
Kryebashkiaku shkruan se do të përdorë çdo armë të mundshme ligjore për t’i mbrojtur ata.
“Deri më sot jam përballur me çdo akuzë, shpifje, të pavërtetë apo lajm të rremë që prej kohesh kanë dalë për të ulur në sytë e gjithkujt imazhin tim.
Të qenurit pjesë e politikës padyshim që të bën të jesh në shënjestër të shumë kazanëve mediatik vetëm për të përmbushur kërkesat e personave të etur për pushtet që fshihen pas siglave televizive.
Megjithatë kurrë nuk kam dalë kundër tyre hapur pasi jam individ që di ti përgjigjem drejtësisë për aq kohë sa punën dhe postin që ma kanë besuar qytetarët e mi e drejtoj me ndershmëri dhe pastërti. Por fakti që përveç meje po baltosni familjarë të mi me akuza tepër të rënda dhe të pafalshme, madje për të disatën herë, më bën të reagoj dhe të përdor çdo armë të mundshme ligjore për t’i mbrojtur ata.
Kushdo që na njeh e di mirë me sa mund dhe djersë ka arritur familja ime të jetë kjo që është tani dhe për të gjithë ata që nxjerrin fjalë të tjera përveçse kësaj të vërtete, tashmë do të shihemi qoftë edhe për shpifjen më të rëndomtë, në dyert e të gjitha institucioneve të drejtësisë.“- shkruan Memolla në reagimin e tij.
Aktualisht, Memolla është në gjykim në gjendje të lirë për akuzën e korrupsionit aktiv në zgjedhje, kryer në bashkëpunim. Hetimet për çështjen nisën pas publikimit në media të një audio-përgjimi bërë në prag të zgjedhjeve të pjesshme të 6 marsit 2022. Në material, Memolla dëgjohet duke ndërhyrë tek një elektricist i OSHEE-së për të mos i ndërprerë energjinë elektrike një familjeje të varfër, me qëllim që tu marrë votën.
