Prokuroria e Posaçme (SPAK) konfirmoi se ka nisur hetimet ndaj drejtorit të Përgjithshëm të Tatimeve Ceno Klosi, i akuzuar për korrupsion, shpërdorim detyre, mashtrim dhe falsifikim dokumentash.
Burime bëjnë me dije se SPAK i ka sekuestruar telefonin Klosit si dhe dy vartësve të tij, shefit të kabinetit, Elird Qendro dhe drejtorit të rimbursimeve, Gj.Smokthina.
Prokuroria e Posaçme njoftoi një ditë më parë përmes një shkrese zyrtare se hetimet ndaj kryetatimorit Klosi u regjistruan mbi bazën e dy kallëzimeve të bëra nga Partia Demokratike.
“Mbi bazën e kallëzimit penal të dërguar nga grupi parlamentar i subjektit politik Partia Demokratike, Prokuroria e Posaçme Kundër Korrupsionit dhe Krimit të Organizuar ka regjistruar Procedimin Penal Nr.259/2023 datë 13.12.2023, për veprat penale “Korrupsioni pasiv i personave që ushtrojnë funksione publike ”, “Shpërdorimi i detyrës”, “Falsifikim i dokumenteve” dhe “Mashtrimi””, njoftoi prokuroria.
Ceno Klosi, ka punuar për 13 vite si specialist dhe drejtues sektorësh në banka të nivelit të dytë dhe më pas gjatë periudhës 2015-2021 ka mbajtur pozicionin si Drejtor i Departamentit Ekonomik në OSHEE. Në qershor të 2021 u emërua Drejtor i Përgjithshëm i Agjencisë Kombëtare Ujësjellës- Kanalizime dhe Mbetjeve të ngurta, ndërsa me VKM 625, datë 22/10/2021 u emëruar drejtor i Përgjithshëm i Tatimeve./Voxnews
