Trajneri i kombëtares shqiptare, Sylvinho foli në konferencën për shtypin përpara miqësoreve me Kilin (22 mars) dhe Suedinë (25).
Tekniku i kuqezinjve ka shpjeguar se këto ndeshje do të shërbejnë për të bërë disa testime të rëndësishme për grupin kuqezi, në funksion të Europianit.
Sylvinho gjithashtu deklaroi se Kombëtarja është e hapur për afrime të reja.
“Kili-Suedi? Janë dy ndeshje shumë të rëndësishme. Çdo lojtar ka historinë e ardhjes deri këtu. Është momenti që ne të provojmë sa më shumë elementë.
Manaj-Broja? Kemi një rrugëtim përpara, do të luajmë këto dy ndeshje, në të cilat jemi shumë të përqendruar.
Jam shumë i karikuar në punën time dhe në vëzhgimin e Manajt dhe Brojës. Duhet të rritim nivelin tonë të lojës në çdo drejtim, sepse do të përballemi në Europian me kundërshtarë të nivelit të lartë.
Zgjedhjet e Europianit do të jenë të vështirë, por atë vuajtje le ta lë për muajin maj. Tani të fokusohemi te Kili dhe Suedia. Nuk e kam mendjen te lista finale e Europianit.
Frikë? Jo, kurrë. Nuk kam frikë nga impakti që do të kenë lojtarët e rinj. Kombëtarja është e hapur, e kam thënë që në fillim. Nuk jemi një klub me 23-24 lojtarë, që pret merkarton për t’u përforcuar. Raporti në dhomat e zhveshjes është shumë i mirë. Dhe as që jam i shqetësuar për këtë aspekt.
Kemi rastin e Hoxhës, të cilin e ndjekim prej 3 muajsh. Nuk është i vetmi, kemi ndjekur edhe lojtarë të tjerë. Dera është e hapur për të gjithë”.
Kontrata?
Ne kemi një raport shumë të mirë me Kombëtaren. Të gjithë ne jemi të përqendruar te Evropiani, aty duhet shumë energji. Kemi një grup shumë të fortë. Kur të kthehemi nga Evropiani mund të flasim. Nuk jam aspak i shqetësuar për çështjen e kontratës.
Miqësoret vendimtare për listën e Europianit? Do të jetë e rëndësishme, nuk di të them nëse vendimtare, por shumë e rëndësishme. Unë dhe stafi nuk mund të harrojmë rrugëtimin, por do të jetë e rëndësishme. Të gjithë marrin 25-26, ndokush 27 lojtarë, ky është momenti të provosh diçka, të shohësh lojtarë. Vendimtare nuk di të them, por e rëndësishme po.
