Operacioneve të njëpasnjëshme për goditjen e shpërdorimit të detyrës, falsifikimeve dhe korrupsionit lidhur me pronat në Sarandë, pritet t’i shtohet edhe një tjetër.
Sipas burimeve konfidenciale, SPAK ka marrë indice nga një procedim penal i vitit 2022 duke hapur një dosje të re hetimore lidhur me dhënien e lejeve të ndërtimit në Sarandë e Ksamil. Pikërisht në kuadër të kësaj, muajt e fundit janë thirrur për të dëshmuar në SPAK disa banorë të Sarandës e Ksamilit, të cilët janë pyetur për hetimet që po zhvillohen. Mes tyre, sic bëjnë me dije burimet, ka edhe përfitues të lejeve të ndërtimit nga Bashkia e Sarandës gjatë viteve të fundit.
Përpos kësaj, oficerë të policisë gjyqësorë të SPAK kanë sekuestruar disa dosje në Bashkinë e Sarandës, por nuk dihet nëse janë në kuadër të hetimeve që po zhvillohen për këtë cështje, apo për procedime të tjera.
Të njëjtat burime konfirmojnë në fakt se SPAK nuk ka nën hetim vetëm këtë procedim për Sarandën, por edhe disa dosje të tjera. Për këtë janë sekuestruar materiale gjatë muajve të fundit edhe në institucione të tjera vec Bashkisë, madje në një rast edhe në Komisariatin e Policisë Sarandë është marrë dokumentacion lidhur me një procedim tjetër, sërish për cështje prone.
