Nga Boldnews.al
Kryetari i Bashkisë së Elbasanit, Gledian Llatja, ka nxjerrë në ankand skuadrën e futbollit Elbasani. Një skuadër e re futbolli, e krijuar në vitin 2021 dhe aktualisht është në Kategorinë e Parë. Madje, është në vendet e para, ku po lufton për të shkuar në Superiore. Por, në momentin që skuadra po prodhon rezultate dhe është gati për në Elitë, ka ardhur edhe njoftimi i beftë: skuadra ka dalë në ankand! Njësoj siç bëri disa javë më parë edhe skuadra e “Shkumbinit”, që militon në Kategorinë e Dytë (të tretën).
Duket se nxjerrja në ankand në këtë moment mund të sjellë pështjellim te stafi drejtues dhe ai futbollistik. Precedenti me ish-skuadrën e atij qyteti, e cila ka falimentuar dhe është në pronësi private, mund të sjellë përsëritjen e atij skandali. Por, kujt ia ka premtuar këtë skuadër Gledian Llatja? A ka ndonjë biznesmen të preferuar, tashmë që skuadra me shumë mundësi është në Superiore? Duket një skenar i rrezikshëm i ndërmarrë nga Llatja dhe ata që drejtojnë aktualisht “Akademinë e Futbollit Elbasani”.
Shpallja e ankandit për shitjen e 70% të aksioneve të skuadrës “Elbasani”
Dokumenti i mësipërm, i siguruar nga redaksia e BoldNews.al, është ankandi i hapur nga Bashkia e Elbasanit. Bëhet fjalë për një procedurë të hapur, me objekt “shitja në ankand e 70 % të aksioneve të Shoqërisë Tregtare Sportive ‘Akademia e Futbollit Elbasan”.
“Përshkrimi i shkurtër i objektit të shitjes është se aktualisht Bashkia Elbasan është aksioner i vetëm i Shoqërisë Tregtare Sportive ‘Akademia e Futbollit Elbasan’ sh.a, duke pasur pronësinë e 100% të aksioneve të shoqërisë. Me vendimin nr.118 datë 30.11.2023 Këshilli i Bashkisë Elbasan miratoi raportin e vlerësimit dhe autorizoi shitjen në ankand të 70 % të aksioneve”, thuhet në këto dokumente.
Më tej, sqarohet se vlera fillestare nga do të nisë ankandi është 13.838.650 lekë.
Vendi i zhvillimit të ankandit është në ambientet e bashkisë, në sallën multifunksionale, kati i katërt. Dokumentet do të duhen të dorëzohen deri më datë 3 prill 2024, çka përkon me fazën finale të Kategorisë së Parë.
Nisur edhe nga çmimi, duket se pas këtij veprimi të “fshihet” ndonjë biznesmen afër Llatjes ose Taulant Ballës. Shpejtimi i ankandit vetëm favorizon blerësin, pasi aksionet e skuadrës kur të ngjitet në Superiore mund të shumëfishohen.
Po përse kjo ngutje? Nëse do të prisnin ngjitjen, të paktën vlera do të duhet të ishte mbi 1 milionë euro. Rezultatet sportive, por edhe kushtet e skuadrës së parë dhe atyre zinxhir, janë shumë të mirë dhe të sapo investuara. Por edhe stadiumi i restauruar është një vlerë plus, por jo për Llatjen dhe personave që qëndrojnë pas. Veprimet e tyre rrezikojnë të përsëritet precedenti i mëparshëm, ku skuadra pasi u privatizua, falimentoi!
