Ka nisur mbledhja e Konferencës së Kryetarëve, ku po diskutohet për një marrëveshje mes mazhorancës dhe opozitës për të normalizuar situatën në Kuvend, ku pikat kyçe të negociatave janë komisionet hetimore parlamentare, reformën zgjedhore dhe një reformë të mundshme në drejtësi.
Të pranishëm në mbledhje, veç anëtarëve të mazhorancës, janë dhe përfaqësues të opozitës si Gazment Bardhi, Agron Gjekmarkaj, Zheni Gjergji, Jorida Tabaku, por gjithashtu është edhe Flutura Açka e grupimit të Lulzim Bashës.
Burime nga mbledhja bëjnë me dije se kreu i grupit parlamentar të PS-së, Bledi Çuçi e ka cilësuar si një sinjal të mirë pjesëmarrjen e opozitës për t’u rikthyer në normalitet. Lidhur me kërkesën e opozitës për ngritjen e komisioneve hetimore, Çuçi tha se kjo e drejtë kushtetuese nuk i është mohuar.
“Sa i takon ngritjes së komisioneve hetimore ky ka qenë një pseudo-konflikt. Kërkesa duhet bërë sipas ligjeve dhe vendimit të Gjykatës Kushtetuese. Kemi qenë të qartë për përshtatjen e objekteve të komisioneve hetimore. Nëse ne rregullojmë objektet e kërkesave për komisionet hetimore siç e kërkon ligji, ne jemi të hapur për të diskutuar, ka thënë Çuçi.
Më tej ai çmoi rolin e opozitës në Parlament duke përmendur edhe ligje që duan shumicë të cilësuar.
“Ka një sërë ligjesh që duhen miratuar me një shumicë të cilësuar siç është amnistia penale, por edhe ligje të tjera që lidhen edhe me rrugën e integrimit në BE e jo vetëm. Kështu që përfshirja e opozitës është e rëndësishme për të pasur një produkt të mirë në finale”, tha Çuçi.
Burime bëjnë me dije se mazhoranca i ka dhënë dritën jeshile mazhorancës për ngritjen e dy komisioneve hetimore parlamentare, atë të ndërhyrjes në sistemin TIMS dhe koncesioneve në shëndetësisë.
