Edevaldo Haxhiu, nipi i kreut të FSHF-së Armand Duka, është lënë në qeli nga gjykata e Tiranës. Për Haxhiajn, të arrestuar nga “Shqiponjat” në Tiranë pasi u kap me armë zjarri dhe kokainë teksa lëvizte me automjet, gjykata e Tiranës vendosi këtë të hënë masën e sigurimit personal arrest në burg.
Ndalimi i 39-vjeçarit erdhi “bazuar në informacionet e siguruara në rrugë operative”, bëri me dije policia e Tiranës përmes një njoftimi zyrtar të shtunën. “Shërbimet e Sektorit të Forcës së Posaçme ‘Shqiponja’, në rrugën ‘Frang Bardhi’, kanë ndaluar automjetin me drejtues shtetasin E.H., 39 vjeç, banues në Tiranë. Gjatë kontrollit fizik dhe të automjetit, shërbimet e Policisë, i gjetën 39-vjeçarit, një armë zjarri pistoletë me krëhër e municion luftarak, dhe një sasi lënde të dyshuar narkotike kokainë”, thuhej më tej në njoftimin e bluve.
Në seancë, 39-vjeçari tha se kokainën që iu gjet në makinë e kishte për përdorim vetjak.
Emri i Edevaldo Haxhiut u lakua në rastin e arrestimit të bosit turk të kriptovalutave Fatih Ozer, të arrestuar në Shqipëri në verën e vitit 2021 dhe të ekstraduar më pas drejt shtetit turk në prill 2023.
Haxhiu u akuzua se ndihmoi turkun “për t’iu shmangur organeve ligjzbatuese, duke e transportuar dhe e fshehur atë”.
Megjithatë, 39-vjeçari u lirua pak ditë pas arrestimit nga gjykata e Tiranës, ku dëshmoi se nuk kishte dijeni që Faru Fatih Ozer ishte person i shpallur në kërkim ndërkombëtar.
