Kryeministri Edi Rama la të kuptohet se edhe zgjedhjet e ardhshme parlamentare do të zhvillohen me ligjin ekzistues.
Në një konferencë për mediat pas përfundimit të një takimi me kryebashkiakë, Rama tha se palët mund të propozojnë qëndrimet dhe propozimet e tyre, por shtoi se nëse nuk do të sigurojnë votat e nevojshme për tu miratuar, në zgjedhjet e ardhme do të shkohet me kodin ekzistues.
“Kanë kaluar disa muaj sa i takon reformës së komisionet zgjedhore është një praktikë që ka dalë nga kontesti i kohës që jetojmë dhe me mbarimin e afatit për ata gjëra që do të donim ti adresonim përmes një komisioni do ia lëmë në tryezë kuvendit. Nëse do të ketë të tjerë që do të duan të lënë porositë e tyre ti lënë. Nëse nuk ka vota do të bëjmë zgjedhje me ligjin ekzistues. Kaq e thjeshtë është”, tha ai.
Lidhur me kërkesat e refuzuara të opozitës për komisione hetimore parlamentare, Rama përsëriti qëndrimin e mbajtur më herët nga socialistët.
“Ne nuk kemi refuzuar e nuk kemi shkelur asnjë të drejtë për ngritjen e komisioneve hetimore. Refuzuam të votojmë iniciativa që në emrin e komisionit hetimor shkelnin kornizën e mirëpërcaktuar nga vendimet e Gjykatës Kushtetuese”, tha ai.
