Efektivë policie civilë, disa prej të cilëve të maskuar me kapuçë, u turrën dje drejt protestuesve, pas përfundimit të tubimit para kryeministrisë, duke shoqëruar forcërisht disa prej tyre.
Këtë të mërkurë, burime zyrtare nga policia e Tiranës konfirmojnë se 4 prej të shoqëruesve janë arrestuar, ndërsa 6 janë liruar për tu proceduar penalisht në gjendje të lirë. Sipas bluve, të arrestuarit dhe proceduarit “ushtruan veprime të dhunshme gjatë protestës së ditës së djeshme, duke hedhur lëndë piroteknike (kapsolla, flakadanë, molotov), në drejtim të punonjësve të Policisë dhe të një institucioni shtetëror (kryeministria)”.
Në pranga u vunë: K.T., 21 vjeç, A.M., 18 vjeç, B.K., 37 vjeç, dhe I.S., 33 vjeç. Ndërsa të proceduarit janë: A.I., 20 vjeç, R.Sh., 20 vjeç, M. M., 20 vjeç, M. S., 19 vjeç, G. P., 22 vjeç, dhe D. Th., 21 vjeç.
Sipas të njëjtave burime, gjatë këqyrjes së vendit të ngjarjes u sekuestruan në cilësinë e provës materiale: 21 flakadanë të plasur; 1 bidon plastik 0.5 L, e mbushur me lëndë djegëse të dyshuar benzinë, me kapsollë të paplasur; 37 bidona plastikë uji, 0.5 L; 6 bidona plastikë të djegur, me aromë lënde djegëse benzinë; 3 kapsolla. Gjithashtu, janë sekuestruar në cilësinë e provës materiale 110 kapsolla, që iu gjetën këtyre shtetasve, gjatë kontrolleve fizike.
Policia shton se nën drejtimin e Prokurorisë, “vijojnë punën për identifikimin dhe kapjen e personave të tjerë të përfshirë në akte të kundërligjshme gjatë protesës së ditës së djeshme”.
Shoqërimet me forcë u dënuan nga opozita si akte joligjore.
Protesta kombëtare e thirrur nga opozita pasditen e së martës kishte pjesëmarrje masive dhe u zhvillua kryesisht paqësore, me përjashtim të disa akteve revolte si hedhja e lëndëve piroteknike drejt kryeministrisë në fundin e saj.
Për herë të parë, protesta shënoi bashkimin e deputetëve demokratë në shesh pas disa viteve.
Një fjalim përmes teknologjisë mbajti lideri i PD-së Sali Berisha, i cili u shpreh se “inaugurojmë sot misionin tonë në Tiranë dhe mbarë Shqipërinë, betejën pa kthim të mosbindjes civile kundër diktaturës së dytë” të kryeministrit Edi Rama.
