Futbolli gjerman ka humbur një kampion bote.
Andreas Brehme u shua natën mes së hënës dhe të martës në Mynih në moshën 63-vjeçare. Dyshohet se humbi jetën si pasojë e një ataku kardiak, raporton “Bild”.
Andreas Brehme ishte heroi i finales së Kupës së Botës 1990 në Romë, për gjermanët. Në ndeshjen përballë Argjentinës së Maradonës, mbrojtësi shënoi golin e vetëm të takimit nga pika e bardhë e penalltisë.
Si futbollist, luajti për Saarbrücken, Kaiserslautern (ku më vonë ishte edhe trajner), FC Bayern, Inter dhe Real Zaragoza.
Brehme luajti 86 ndeshje me kombëtaren gjermane, duke shënuar 8 gola.
