Në emisionin “Elite Show” në SuperSport, gazetari dhe komentatori, Ylli Aga foli për mungesën e masivitetit të tifozëve në Air Albania në ndeshjen derbi mes Partizanit dhe Tiranës.
Ylli Aga, komentoi disa nga arsyet që bëjnë që tifozët të mos i mbushin plot shkallët e stadiumit ndërsa theksoi se faj kanë edhe skema e re e kampionatit.
Nga ana tjetër, Ylli Aga i bëri një thirrje edhe Ministrit të Brendshëm, Taulant Balla për sjelljen e policëve në hyrje të stadiumit.
Mungesa e tifozëve? Besoj që në masë të konsiderueshme derbi është vendosur nga skema e re e kampionatit që ia zbeh disi rëndësinë. Me skemën e vjetër çdo ndeshje ishte si finale.
Duke pasur edhe transmetimin pa pagesë, një pjesë e tifozëve mund të jenë dembelosur. Është punë e dobët e klubeve për ta promovuar dhe për të bërë oferta për tifozët. Klubet nuk kanë në organikë njerëz që merren me këtë punë”.
“Një përqindje e konsiderueshme e tifozëve nuk shkojnë më në stadium se i është bërë ferr hyrja në stadium. I bëj thirrje Ministrit të Brendshëm Taulant Balla i cili ka parë shumë ndeshje në stadiumet më të rëndësishme europiane.
Askush nuk shkon dy orë më parë për t’u futur në stadium, policët të sillen me dinjitet ndaj tifozëve pasi ata nuk janë njerëz që kërkojnë të pushtojnë një institucion. Ka pasur sjellje denigruese ndaj familjarëve dhe njerëz besnikë të sportit.
Nuk ka mundësi që në derbi të kalohen dhjetë radhë me policë që të kontrollojnë çfarë ke xhepa. E pabesueshme që nuk hapen të gjitha dyert e stadiumit, këtu edhe klubet duhet të bëjnë më shumë në bashkëpunim me Federatën dhe policinë.
E fundit për policinë. Për hedhjen e fishekzjarreve përfundon në burg, këta njerëz duhen identifikuar. Air Albania është impianti më i pajisur me kamera, penalizoje dhe gjobite. Mos e lejo të vijnë më në stadium, dhe një përqindje pse njerëzit nuk vijë është sjellja harbute e policëve jo vetëm në derbi, por edhe me kombëtaren.
Janë goditur fëmijë nga policia, është e turpshme dhe e tmerrshme”, u shpreh Ylli Aga. I cili insiston që gjithçka zgjidhet me ligj.
